Zomi te a tamzaw pen ih pianna phungpi ih kanciang in Ciimnuai pan a piang mah ki citangtang hi. Tua a hihleh Phunom khua e, koipan a hongpiang, koipan a hong kisat, koipan a hong ki beel a, kibangci sat a, koimun teng ah om-a, a min ki bangci phuah peuhmah hiam, PHUNOM mite e leh, koisungpan hong piangkhia hi peuhmah a, koimun teng tawh in, koimunteng ah teng in Phunom khua hong bangci tun peuhmah hiam, cih ihpu masa te’ ciaptehna te ensuk dih ni.

               Pawlkhat te-in tangthu suutsuut in a tawpna ah Zomi kici ih hihman in Zo mai ah Pu behlap in Pu Zo ci-in mi suaksak in tua Pu Zo ii suan hihang a cizong om hi. Pawlkhat leuleu in Zhou Dinesty kici Zhou pen eilai a ihgelh ciang in Zo kici a, tua mite pen Zomi kici hi, a cizong om hi. Pawlkhat te-in mualtung kenkawm guamkawm zolak ah ih tenman in Zomi a kici hihang, aci zong omhi.

               Zomi tangthu tuamtuam leh Hiangzang – Phunom ih pu leh pa te’ ciaptehna ih etciang in ih tangthu pen Mongolia, Khul, Chindwin leh Izuadi gundung, Luika khua, Ciimnuai, Engzang, Hiangzang cihbang in a hunhun in ih pute’ tenna te na ki zomto diudeu hi.

               Leitung ah minam picing khat in amau tangthu kician tak in nei uha, a khang akhang in ettheih dingin laibu kician tangthu kician na nei uh hi. Ei “Hiangzang a mi” ci-a kitamlawh Phunom mite zong mailam ah ihtu ihta te’ simtheihding in ih ngeina, ih khangthu te kiciantak in ih neih akul ahihi. Tua ahihman in hih laibu in khangthak ihtu ihta te a ding in van manpha khat hong hi khading hi, cih ih ngaihsun hi.

Ngin Sian Thang

2023

Hih Laibu bawlding ih ngaihsut pen tum akum bangzahhiam khat laipek in ih sawmsawm hi-a, thu leh la ih kaihkhopna leh vai tuamtuam tawh tu ta ngawngaw in simtheihding in hong suakkhia thei a hihman in ih lungdam mahmah hi.

Laibu sung a ihzat lai bulpi te pen Pu Tun Pau kaihkhopna te dapphah in, Pu Kham Kho Hau, Pu Tun Sing, Pu Hang Za Nang te’ ciaptehna te tawh etkaak in a kizang a hihi.

Laibu kipatna lam tengpen Rev. Lam Suan Thang ii Phunom Khua Tangthu (unpublish) ngualhzia dapphah in a kizang hi-a, atung a ihpu te’ ciaptehna te tawh ki enkaak in ih behlap zong om zeuhzeuh hi.

 Hih Rev. Lam Suan Thang ii gelhte pen khua tangthu laibu ihbawlnop ciangin ama neihsa siiktaw tawh khetsa publish nailoh (unpublished) phaltak in hongpia in Pastor Nang Za Mung in computer tawh avekin hong khenkik zihziah hinapi lemlohna tuamtuam leh behlapnop tampi hongom a hihman in a lem paklo hongsuak hi. Phaltak a hongpia Rev. Lam Suan Thang leh hong khetkiksak Pastor Nang Za Mung tungah zong lungdamna lianpi ihko phapha hi.

Nop mun, dah mun, lo, sa betna, lengkhawlna mun tuamtuam leh khat tang omna mun ah amun leh ahun zui in a nuai a tum thei tuamtuamte kizang hi.

(1) Zam (2) Khuang (3) Sialki (4) Daakbu (5) Daaktal (6) Sialki (7) Phiit bu (8) Guaphal tah (9) Guadaak (10) Lingdong (11) Tamngai (12) Lawingeet (13) Lemle (pengkul)

MINAM TUAMTUAMTE PIANNA

Pong Kumpigam (Pong Kingdom)

A.D 80-1474 sungin Pong kumpi (Shante) in hong uk ngei-a, Bengalagam, Sengam, Vietnamgam le Kawlgam Laizang phei pawlkhat haum hi. A kumpite in Thailand Panin uk a, Pong kumpi khangsimna ah Zomite na ki hel hi. Hih pong kingdom ah State 10, District 99 om a, state nambat 9na pen Zo kumpi gam (Zo Province) kici hi.

Zo kumpi gam sungah District 4 om a,

-   Khangsei (Nagaland leh Manipur saklam teng)

-   Kathe-meitei,

-   Kalay(Chindwin), leh

-   Khampat hi in, Khampat pen nitumna lamah khuapi pen, District Center ahih hi. Tua ahih manin ‘Zo’ cih pen tanglai pek a omsa, kumpigam khat a makaih, a kizomsuksuk min hi ci-in ki ciamteh hi.

Ei leh Ei Ih Ki Lawhna Min

Pawlkhat in Zomite pianna pupi min Pu Zo hi-a, tua ii suan le khakte khempeuh Zomi hi ci-in ciamteh uh a, khangsimna paipi zong Pu Zo pan in kipan sak uh hi.

Pawlkhat in Zomite mualtung ah ki teenga, mualtung pan “Zogam” ki ci-in, ih teenna mun min pua a “mualtung mite” cihna in “Zomi” kici hihang ci-a aciamteh om hi.

Pawlkhat te ciamtehna ah sangmangte khamtung ah hong paicil lai-in, note kua suan hi-a napu min uh bang hiam, ci-a a na dot ciangin tangthu theizawdeuhte in kapu uh “CIN HIL” hong ci hi, ci uh hi. Tua manin Mikangte in amau’ lawh theih pen in Zomite “CHIN” hong ci-a, I gam “CHIN HILL” hong ci hi, ci pong uh hi.

Tua ahih manin khamtung gama a teeng mite ei le ei “CHIN” a kici tatak omlo-in “Zomi” ahih kei leh tua tawh akhiatna kibang, a ki zawitawnin kilo, kisim hi hang, cih anuai-a bangin kilawhna tuamtuamte kimu thei hi.

(1)     ZOMI -Tedim, Tonzang, Kalay khenkhat, Tamu khenkhat leh India gam a khen khatte.

(2)     LAI ZO -Falamgam a teeng te.

(3)     LAI MI -Hakha & Thantlanggam a teeng te.

(4)     ZO/CHO -Mindat le Kanpetletgam a teeng te.

(5)     KHUMI -Paletwagam a teeng te.

(6)     ACHO -Kawlgam khanglam zaanggam Zomi te.

(7)     MIZO -Indiagam Aizawl State sunga teeng te.

(8)     KUKI -Bengaladesh, India, (Assam State ah Old Kukite, Manipur ah New kukite) kawlgam, Nagaland, Tonzanggam a teeng Zomite.

(9)     THAHDO -Kukite Thahdo minam akibang hi-a, amun leh amau’ deihna zui-a kikhen hi.

(10) MEITEI-Indiagam, Meitei uk sunga teeng te.

(11) NAGA -Indiagam Nagaland Le Sagaing Division leilu lam kuam ah teeng hi.

(12) CHAUNG-Bangaladesh gam mualtungte ah teeng hi.

(13) YAO, MIEN, MYO, HMONG-Vietnam, Lao, Thai le Sengam mualtungte ah tawmtawm teenguh hi.

Mite’ Hong Lawhna Min

Eite bangbang in min ki neisak talehang, apualam panin minamdang te’n hong lawhna le hong ki sapna khattek omhi.

(1)     CHIN - Kawlgam kumpi in hong ciamtehna min hi-a, zumthu cihte ah aki zangh ih minam min hi.

(2)     KHAANG - Ih beh Kachin te hong sapna min hi-a, amau pau-in “uu” (အကို)cihna a hihi.

(3)     CHIANG - Yaw, Rakhin leh Shante hong sapna min hi.

(4)     CHAW - Kayin te hong sapna min hi

Minam Hong Pianna

Zomi a kici diak, Tedim, Tonzang, Manipur, Khanti, Lesi, Homalin,Tamu le Kalaygamsung a mite sungah zong teenna mun le mual zui-in ‘pau’ kilam danga, Minam neu tuatuam in kilawhna hongpiang hi. Amunmun ah mun leh mual zui-in a tuamtuam om a, 1962 kum a Tawlanzi kumpi hong khan ciangin, 1967/68 pawl in amunmun a tangthu leh ngeina hong kan a, Tedim, Tonzang, Tamu le Kalaygam sunga Zomi a kici diakte minam 10 in hong kipsak hi;

1. Saizang       6. Sihzang

2. Teizang       7. Zo

3. Dim             8. Thahdo-Kuki

4. Khuano        9. Hualngo

5. Guite           10. Tedim

(1) Saizang Mite’ Pianna

Mi masa te ciimnuai khua ah ateen lai-in, khuasung ah gamsaai kung pona zaangtam khat om a, tua zaanga tengte amun min pua-in ‘Saizangte’ na kici uh a, a nung sang ciangin tua pana apiang mite ‘Saizang minamte’ kici hi. Ciimnuai khua hong siat ciangin tua Saizang khuamun ah kituah uha, tuapan hong khangkhia uh hi.

Teenna Khuate; Saizang, Tualzang, Teeklui, Lailo, Thaangzang, Vongmual, Aipha, Mualpi, Tuitawh, Thalmual, Phaiza, Zampi, Taleek, Hiangawn, Tuitang.

(2) Teizang Mite’ Pianna

Ciimnuai khua ah a kiteen lai-in, pawl khat meitei gun dungah lalsuk uha, gunpika a tun ciangin Luikaa khua ci-in na teeng uh hi. Khua zaangtual biakna pen khualaizang a Paangsing pi nuai suangtumpi khat gei ah bawl uh hi. Nitak khuaphat, kha-tan ciangin naupangte tua suangpi phuang ah kimawl zeel uh a, naupang mang thei zeel hi.

Hong et phat uh ciangin tua suangpi nuai ah kuahawm khat om a, tua sung pan in gulpi khat in naupang la thei zeel hi. Khua mite in thaang a siah leh gulpi awk a, akaih uh leh a gulpi saulua in ki kaikhia zolo hi. Tua teh a gulpi hong pau-a, “Ka omna thuuk mahmah a, ka mei-in gun abaan hi, vansuangzawl ah kivial hi, hong kai zo kei nuteh’ acih ciangin gulpi attan in a khuazangin a sa hawm uh hi.

Meigong nupi khat asa pialo-in, a lutang pia uh a, tua nitakin meigongnu in bualtungkhua pan zin nih a nei hi. Nupinu in a gul lutang huan a, buhtei tawh a zauh leh gul lutang hong pau-in: “ka mit nong sun kha deh” ci hi. Nupinu zong lau-in vokkuang ah bua hi.

Zankim tak ciangin ak lamdang khat hong khuanga, “zinte kha ve vua” ci hi. Innteeknu lunghimawh in a khuapihte kiangah agen hang thudon lo uh hi.

Innteeknu in akkhuang a zakkik tak ciangin, a-ui tal leh a zinte nih tawh pai khia in, khuanawl a tunphet in huihpi nunga a khua kicim in a khuabup un sicip uh hi. A zin tegeel akhua uh ah ciahsuak a, nupinu baangzang ah teeng hi.

Nupinu a gaisa in a pasal in a nusiat hi a, a uital tawh luikaa khua Baangzang khua hong teen ciangin nau hong suak a, amin Suk Zo phuak hi. Naupang ong khan ciangin tu a Mualbeem khuamun Teeipi phung khat ah hong teeng hi. Tua teeipi paulam in Teeizang pau leh minam hong piang khia hi.

Ak khuan aw ciaptehna tuamtuam te:

“Ngente te khua kilawi, malzinte tai ta ve un”

“khuabe khua min in luan, alai-a nutate le zin tun aw na tai in” (Zote)

Baangzang khua ah nupi nu a nopsak sunga a la phuah:

(a) Luikaa khua men in vuk taleh,

Baangzang dawh in tam nalai hi e.

(b) Lianu Khat in khua vasaat ing,

Baangzang ah bansang ka gual hi e.

Teenna Khuate: Mualbeem, Zangzawl, Dakdung, Buan, Heilei, Suangphei, Sim Suangzang, Langzang, Pangsak, Zangtui, Mualnuam, Gawsing, Tuipi, Pangzang, Keltal, Luangel, Saipimual, Lingthuk, Vaikhuamun, Sialtui, Fartlang.

(3) Dim Mite’ Pianna

Ciimnuai khua panin pawlkhat in Geeltui khua hong saat a, tagah Thang Ho leh Lian Do te unau hong nuamsa hi, ci-in ki ciamteh hi. Geeltui panin pawlkhat in Dimpi khua hong saat a, Dimpi pan Dimlo ah pawlkhat hong peem in, tua Dimpi, Dimlo pan a hong khangkhia teng Dim minam kici hi.

Teenna khuate: Dimpi, Dimlo, Sezang, Laitui, Tuicinlui, Tungzang, Suanghoih, Mal Suangzang, Tedim, Pyidawth, Kalaymyo.

(4) Khuano Mite’ Pianna

Ciimnuai pan geeltui, Dimpi a teengte lakpan in Suante pawlkhat in Sasih khua saat hi. Inn 7 bek pha-a, Tawmno cik tengden ahih manin khuano a kici pai suak ahi hi. Sasih khua pan a khangkhiate khuano mite kici uh a, tua pan Phunom khua hong zuan uh hi.

Teenna khuate: Zung, Phunom, Thangnuai, suangpi, Tuisau, Laibung, Tuivial, Pimpih, Ngalzang, Tampi, Cingpikot, Muallum, Vando, Dimzang, Pyidawtha, Nawikai, Dolluang, Mualnuam, Budiman, Lalta, Khuabem, Tuilang, Lunmual, Phaileng,

(5) Guite mite’ Pianna

Ciimnuai ah Pu Song Thu Suan Thahdo gam luah Aisan gui Sek Thah in a zi ta nei theilo ahihmanin apano tanu Nem Nep (Nepbuk) tawh omkhawm hi. Nau gil hongneih ciangin a zi pi lungkim nangin a pi-in ngaihsutna khat hongngah a, aktui tang 2 la-in, akong khang singheeng sung khat ah koih hi. Khat vei akhua-upate in a et leh aktui tang 2 muhi. La-in khathuan a, a ciap leh “kha-ei” ci-uh hi. A tangkhat om lai pen a taang beem tung nizangkapna ah koih sakhi.

A Sanggam nunau hong suak tak ciangin, a zipi theih loh kal in beem tunga aktuila khia in, a naungeek koih a, “beem tungah nau kap, i aktui keuh hi’n teh” ci-in azipi lasak hi. Tua ciangin a khua-upate samkik in, nizang kapna pan a kingah cihna in a min Nitui Nigui ”GUITE” phuak uh hi. Guite suan le khak te guite minam kici-a, Laamzang, Vangteh pan hong khangto in India gam dong tung hi. (Ni gui ta upa Guite hi’n tapa nauzaw Ni Vang tate Munluah, Zil-om, Naulak..unaute ahih hi.

Anaute Phiam Phu le Vang Suk tawh unau khat a a ciamteh zong omlai hi.

Teena khuate: Vangteh, pakzang,Tuizang, Thaangsan, Haiciin, Tuimui, Tuimang, Pangmual,Tongciin, selbung, Sekpi, Vaivet, Suangbem

(6) Sihzang Mite’ Pianna

Ciimnuai khua ah pawl khat sihkhuuk omna zang khatah teeng uh a, tua pan a hong khangte Sihzang mi kicihi. Tua pan Thuantak hong saat uha, tu-a sihzang gamsung tengah hong teeng uh hi hi.

Teenna khuate: Thuklai, Khuasak,buanman, Lophei, Bung, Zongal,Voklak, Pumva, Theiizang, Dolluang, Suangdawh, Takkhawl.

(7) Zote’ Pianna

Ciimnuai khuapan in Pu Hang Hil makai in Tung Nung, Lian Zaw tetawh Baalzang khua saat uh hi. Baalzang khua pen mual dawn zopi lakah om ahih manin, tuapan a piangte “Zote” kici a, minam min hong suak hi.

Teenna khuate: Paitu, Haimual, Tualmu, Khuadai, Bumzang, Salzang, Takzang, Phuntong, Sialthaw, Lamthang, Buangzawl, Mimbil, Khamzang, Gamngai, Lungtak, Sialmawng, Anlun, Geelmual, Khianglam Talzang, Phaidim, Thauthe, Maulawn, Khuamun, Lomzang, Seksih, Haipi, Buangmual, Khuaivum, Sialmei, Bizang, Vanlai, Thenzang, Sialthawzang, Tuigialzang, Tuilam.

(8) Thahdo-kukite’ Pianna

Ciimnuai Khua pan pawlkhat gungal nitumna lam Tuimu, Nuamkhua, Ankhum, Tuithang, Tungzang, Ngalbual, Lalta, Tangkhawng, Zampi, Mualpi cihte ah teeng to in India gam dong na tung hi. Thahdo-kukite pen minamkhat, pau namkhat, ngeina khat hinapi, pawlkhat thahdo in kilo uh a, pawlkhat KUKI kici uh hi. Guite pianna Pu Sek Thah in a nungsang ciangin azi pi tawh aneih tapate panin Thahdo namte piang hi.

Thahdo akicite in amau pen apupi uh Thahdo min tawh kilo in ki ciamteh hi. Kuki akicite in amau pen Zomi khem peuh huam a i min hi ci-in ciamteh uh hi.

Teenna khuate: Hangken, Sebawk, Khuangkhan, Thangsih, Bualzang, Hiangzang, Singpial, Tangsit, Balbil, Suangpeek, Halkom, Siallup, Sihpeek, Khuamnuuai, Khuatei, Zonglawn, Aisih, Mawngzang, Pawnpi, Mangkuh, Sulpi.

(9) Hualngo mite pian na

Pu Thlapa in Kachingam tawn in a tap lusei-a tawh Khampat ah hong teenga, tua pan Falam gam suumpi khua ah lal hi. Lusei-a tate sungpan Pu Hualngo suan le khakte Hualngo mi kici-a, Falam, Tedim, Tonzang gamgi dung teng ah teeng uh hi.

Teenna Khuate: Darkhai, Bapi, Bukphir, Ngente, Zimpi, Zimte, Thinghlei, Tuidil, Dampi, Vutbuak, Haimual, Kawilam.

(10) Tedim mite’ Pianna

Tedimte (Tedim clan) ci-in a tuung lam in kua mah om tuam lo hi. Hun hong sawt toto a Pu Kam Hau in Tedim hongluah ciangin tua laitak a ateengsa mi nam(7) Saizang, Teizang, Dim, Guite, Zo, Thahdo-kuki, Vaiphei (Hualngo) te sungpan in pautaang (common language) TEDIM ngeina hongpiang khia hi. Tua ahih main Tedim pau pen a neituam omlo-a akitaang a ih neih vek ahi hi.

Hih minam 7 sungah Ngeina tatzia tawh kisai a bulpi (3) Teizang, Dim, Zo om a, tua teng sungpan ngeina taang TEDIM ngeina hongpianga, hih zong ih taangneih mah ahi hi. Tua ahih manin minam tuamtuam kigawmte Tedim hong teen ciang, tua pan pautaang -TEDIM pau, ngeina taang -TEDIM ngeina hongpian aki pan kuama ai tuam hilo-in, Zomi akici deuh minam(clan) 10 te ki gawmna ahi hi.

Mangkang te hong khanma in Tedim ah Pu Kam Hau’ galmatte simloh beh nampi 20 te teeng khawmin, pautaang, ngeina taang zang khawm thei hi, ci-in ki ciamteh hi.

Tua beh te:

(1)Sukte (2)Guite (3)Thahdo (4)Vaiphei (5)Khuangzang (6)Manlun (7)Mantuang (8)Munluah (9)Zilom (10)Naulak (11)Hatzaw (12)Hatlang (13)Lethil (14)Bawmkhai (15)Buansing (16)Valte (17)Hangluah (18)Tapsak (19)Gualnam (20)Tawmbing

Tedim khua inn 300 aphak laitak (AD-1810) khit ciangin Pu Kam Hau (sukte) makai in Pu Khoi Lam (Hatzaw) leh Pu Mang Gin (Hatlang) te tawh KAM HAU UPADI nabawl-a, Tedim gam taangpi a ki-ukna hi. Vaihawm upate lak ah Thawmte, Naulak(Zil-Om), Lethil, Samte behteng kihel hi.

Source: Vaphual.net [2010] Posted by:Carey Suante

BC Hun

2000 BC: Hih hun lai-in ihpu ihpate Tibeto-Burman dangte tawh Sengam, mal-sak lam Kansu kuam, Lanchou khawpi kiang, T'ao lui ngei tengah teeng dingin ki-ummawh hi.

1850 BC: Noah in Katulah toh a tate ni suahna lam a a sawl khiatna

1750 BC: Mongolia gam tun hun

1700 BC: Mongolia pan China gam zot hun

1600 BC: Khul a pat Gunkuam a kithezak hun

1027-256 BC: Sengamah Jo (Zo) vaihawm lai.

221-207 BC: Sengamah Chin vaihawm (Chin Empire) lai. 

220-200 BC: China gam pan nitum lam zot hun.

150 BC: kiim Kawlgam tun hun.

4 BC: Kachin leh Zomite piankhiatna ihpu ihpate 'Kung-han Ch'i-ang' (Ch'i-ang hiang khat) te, Sengam Szechwan kiimah tenguh hi.

1 BC: Mekhong leh Yangtze luinak lamah teeng uh hi. Pyu ten kawlgamah Sri Ksetra khuapi saat.  Zomite'n Payagyi khua saat.

AD Khit

4: Zomite in Dangka (Taka) nana neikhin dingin ki-ummawh hi. 

6: Chindwin zanggam tengah nana teng uh hi. 

50: pan Chindwin Gunkuam a ten lai hun.

108: Pagan (Pugam); Popa (Pupa) mual kiimah teeng (Dahpa? Penglam? te hun) 

500-600: Kawlgam laizang a ten lai hun.

600: Pyute Kawlmi suak; Kanyante Rakhine-mi suak; Thet mite Chin (Zomi) suak. 

750: Zomite Minbu, Thayet, Aunglan (Myede), Natmauk, Taungdwingyi, Pyi-ah teeng. 

800-50: Zomite in Kabaw valley tung. Khampat khua sat (Khampat pen Zomite sat hi ding hi: Khampat khua pen zang leh kham kipehna, kham kipatna ahih manin Khampat a kici hi ding hi. Mualtung-gam genna 'Kham' cih kammal pen Zomi te bekin nei hi. Hih kuam tengah hun sawtpi kiteeng uh hi. 

900-1400: Kawlzang a ten hun

1044: Anawrahta in Sukte zoin Kumpi lian masa suak. 

1084: Kyansittha zi Kumpinu Thambula (Zomi) 

1200-50: Ihpu ihpa te’n Khampat khua-ah Mawng(Bung)kung suan. 

1254: Narathihapati zi Kumpinu Saw (Zomi) 

1250-300: Khamtung tung; Ciimnuai khua sat. Eimau sunga makaite-Songthu, Songza, Songkip.

1355: Lengtonghoih Ava mangpa zi. Zo minam hiang khat 'Maring' mite Manipur gam tung ding in ki-ummawh hi. Vangteh (a min masa - Khumnuai) kisat ta kha ding hi. 

1364: Zomite Chindwin gunpang phaizangah Shante tawh teengkhawm, Sagaing, Monywa, Dipeyin, Yinmarbin, Mintaingpin, Pale, Gangaw, Pauk, Htilin, Ngape-ah teeng.  Sibani khua-ah Zo Tualsong 15' sang tudong omlai. 

1370: khawhkhen, Kawlpi (Rajagya-Yesayo) tung. 

1400: Chin Hills ihzuatciil hun. Hih hun in Zominam pawlkhatte Tripura gam tung dingin ki-ummawh hi (Halam,Hrangkhawl,Darlong Kaipeng etc). 

1450-700: Lusei te Lentang leh Ciau kikal ah teng. 

1400-1500: Thang Ho leh Lian Do; Cing Khup leh Ngam Bawm; Galngam leh Hang Saite Ciimnuai, Geeltui-ah teeng.  

1250-1900: Eimau beh Hausa, khuasat leh Ukpite makai-in ki-uk. Lai kinei loin khangthu kicianteh lo.  

1500: Zosuan 'Anal' te Manipur tung dingin ki ummawh hi.

1570: Guite Pu Gui Mang in Tedim Khua sat 1600 AD in Khumi mite Paletwa tung tamai thei. 

1650-700: Luseite leh Paite mi ten Ciau kan ta uh hi. 

1700: Alaungpaya kumpipa in khamtung galkap la in Syrian gam sim. 

1720-30: Mara ten Simtuipi tung ta dingin ki-ummawh hi. 

1750: Thahdo-Kuki ten Manipur gam tungkhin uh hi. Biate mite in tua-a Cachar mun tungkhin ding in ki-ummawh hi. 1750-850 Lai mite Mizoram tung dingin ki-ummawh hi. 1775 Lusei ten Zawlbuk/Sawm neih kipan. 1777 Khamtungmite in Chittagong sim. 

1800: Zahau leh Khuangli tawh kipawlin Kam Hau in Thahdo gam la-in uk. Taisunte (Falam) in Lophei sim. Taisunte in Khuasak sim. Zahau leh Khuangli kisim. Taisunte in Mualnuam sim. Hualngo leh Sukte kisim.

1810: kum pawlciangin, Pu Mang Gin, Pu Khoi Lam, Pu Pau Vum, Pu Tel Khaat, Pu Lam Dong, Pu Kam Vial, Pu Kim Thuam, Pu Pau Am, Pu Cin Kim leh Pu Gen Cin te kipawlin Tedim ah hong teeng uh hi.

1813: Rev. Adoniram Judson Kawlgam tung (Missionary masa pen) 

1820: Pu Mang Gin in Tedim khua ah Hausa sem. Tedim gamsung hausa thahat leh minthang kuate:

Tedim …………. Mang Gin (Hatlang)

Vangteh ……… Pum Go (Guite)

Dimpi …………. El Thuam (Naulak)

Saizang ………. Vung Vial (Hatzaw)

Kalzang ………. Sung Hang

Thangnuai ….. Mang Sum (Thawmte)

Khuasak ……… Mat Tuang (Galphuak)

Thuklai ……….. Suan Thuk (Sumniang)

LimKhai ………. Neih Tuang

1830-850 AD: Hmar ten Manipur gam tung uh hi.

1840-1868: Tedim khuapi kiphut kik. Kam Hau in Mualbem pan Tedim zuan.  Hausa - Pu Kam Hau, Galvaan - Pu Mang Gin, Thuzeek - Pu Khoi Lam.  Meitei galpi zo.

1856: Kam Hau leh Zahau kikopin Manipur uk.

1856-1859: Sim leh mal ki do hun. (Mizoram)

1857: Tedim sim ding Meitei 1500 kuan, Meitei in lel.  Zomi leh Meitei kido khatveina.

1862: Mautaam Khat veina.

1871: Guite Innpipa Go Khaw Thang Meitei te’n man.  

1872: in Phaipi tonginn sungah si hi.

1872: Vai khan Khatveina. (Mangkang galkapte Lusei gamah a khatvei lutna uh)

1876: Guite Innpipa Pu Sum Kam leh Meitei Leengpa te’n kilemna bawl.  Guite mi 2000 khawng Lamka gam tung.

1884: Aksi kiat kum (3-11-1884).

1886: Mangkang te’n Zogam (Chin hills) sim kipan. 

1887: Capt. Raikes makaihna tawh Mangkang galkapte Kawlpi tung. Vai khan Nihveina (Mangkangte Lusei gam lut nihveina, ciah kik nawnlo). 

1888: Capt. Raikes in Zogamah Mawtaw lam sial ding ngen, Zomite'n phal lo. Oct 17-29 sungin Zomite in Mangkang 12 that, 122 hingmat, thau lawng 4 leh Laa 4 man khawm.  Sihzang in Kale gam sim. Taisun leh Sukte kipawlin Kawlzang sim. Kam Hau leh Sukte kipawlin Kangyi sim. Sihzang in Mangkang lambawlte suam. Zokhua, Khalkha, Sukte kipawlin Kumpi do sawm. Taisun mi 1000 in Sihaung sim. Capt. George White in khamtung mite dona dingin India galkap Battalion Khat leh Assam kooli 2000 ngenin ngah.

1889: January 23 ni-in Sir. Gorge White, General Faunce, Major Raikes thuamvum tung, Zogam do ding kuan.  Feb.4 ni-in Khuasak la. Feb.13 ni-in Buanman leh Thuklai la. Vangteh leh Saizang la. May. 4 ni-in Siallum kulhah kikap, Mangkang bu 3 leh galkap 83 si, Surgeon khat in V.C ngah. 

Tedim ah kap leuleu, Tedim a hawm in la. Mangkangte 120 si 70 liam. Tedim inn 300 Tonzangah tai. Inn teng halsak. Thangmual pen "Fort White" kici.  Mizoram sim lam panin 'The Expediton 1889' lut, haksatna tuak lo-in Lunglei luak.  Kulh bawl uh.

1890: Sept. in Tonzangah kikap, kilemna bawl. Upa teng tawh maan (photo) zaih, upate'n thei lo, thau sa-in lau. Oct. kha sungin Khaw Cin si, a sanggampa' tapa Hau Cin Khup in a za luah. Hau Cin Khup, Thang Khan Pau, Gin Za Thangte Rangoon kipaipih.

Mangkang Kumpiin Mizoram a uk kipat.  25-9-1890 ni-in Pasal hangsan Khuangchera leh Ngulbawka Tlawng lui ngei-ah Mangkang ten kaplum.

1891: Thantlang la ding kuan, kido, Rs. 5000 gaam.  

1892: (Jan. 27-29) Zo minam teng gam khatah koih kik nading ngaihsun 'Chin-Lushai Conference' Fort William, Calcutta-ah kibawl hi. 

April kha-in Thantlang la zo. Oct 9 ni-in Pumva leh Thuklai kikal ah Myo-ok suam. Kap lum, mi thum bek suakta. Mangkang ten suah lam Zogam bup nuaisiah zo.

1893: Zogam ah thau khempeuh kikhawm, lawng 7000 pha. Kaptel la, Oct. kha-in ukpi 49 Rangoon kihawl pih.  Khuapi teng sikkhau kizom. 

1894: 1-11-1894 ni-in Rev. F.W. Savidge leh Rev. F.H. Lorrain-te Mizogam tun hi. (Khristian Missionary masa pen).  Mizo lai - A, AW, B, kipan.

Jan-Feb. sung B.S. Carey in Cin hills leh Manipur gamgi bawl, Chin hills khen thum kisuah- Tedim, Falam, Halkha. 

1894-95: Mikang kumpi in Falam ah Political officer koih.  Falam leh Halka-ah Sikkhau-to, Thonginn, Zato inn, leh Sumkepna (Treasury) kibawl. Carey leh Tuck in The Chin hills bu gelh. Zogam pan siah (Leiman) Rs.17,572 kingah. Carey leh Ukpite kilemna bawlin gam khensak in, Kam Hau uk khua -167, Sukte uk - khua 20 leh Sihzang uk khua - 16 suah hi. Manipur Khristian missionary masa pen Rev. W. Pettigrew (Ukhul khua-ah).

1895: (September) Kawlgam' gamkhen khat (province) in Mikang kumpite'n Zogam hong ciapteh sakin Kawlgam tawh hong gawm. Mizo Laibu neih kipat kum. 21-8-1895 Lusei pau tawh Thukhunthak Luka laibu nei. Sim leh Mal-a kikhen Lushai hills pen kigawm hi.

1896: Chin Hills Regulation Act kibawl. Hih Thukhun tawh tu huna Chin State, Mizoram, Manipur singtanggam teng uk. Ukpi hong piang:

-   Tedim gamah: Pu Hau Cin Khup

-   Lumbanggam ah: Pu Hrul Mung

-   Falam gamah: Pu Thang Tin Lian

-   Haka gamah: Pu Kio Mang

-   Taichun khua-ah: Pu Con Bik

-   Matu/Mindat gamah: Vumthumaung

Chief Commissoner Sir Frederick Frayer Tedim, Falam, Khalkha hawh. Mizo biakinn masa pen kipan. Kawlgam (Chin hills) leh manipur gamgi kikhung hi.

1898: (2-4-1898) Mizoramah Sangin kipan. Mizo pau in Thuciamthak - Luka leh John kizo. Mangkang ukna deih loin Zomi makaite’n Mangkangte langpanna bawl. Mikangte in Zomi makaite bawlsia.

- Pu Thuam Thawng (thong sungah si)

- Pu Kai Tuah (khantawn thong)

- Pu Taang Pau Dal (thong sungah si)

- Pu Ngul Bul (Mangkang ten that)

1899: Chin hills ah Christian Biakna tung; Missionaary masa pen Rev. A.E. Carsonte nupa, March 15 ni-in Halkha tung. Pu Pau Cin Hau phuat Laipian Biakna leh Zomite Lai neihkik cilna.

1900: Zomite Laisin kipatna, Biakna thak neihna. Pa Pau Cin Hau in Maang mu. Mr. B.S. Carey in ukpi teng tawh kilemna bawlin sialngawng ban. Hau Cin Khup Ukpi-in kikoih.  Mizoram, Mimbung khua-ah Guite Innpipa Kam Za Mang a phat mahmah lai tak hi in, Aizawl DC leh Tedim pan Mikang ulian Dickman ten Mimbungah pha uh hi.  Lushai hills leh Chin hills gamgi kikipsak hi.

1904: Dr. E.H. East-te nupa Khalkha tung. Zomite palik tum cilna; Zo palik kiphuan. Sila kiphiat. Zogamah Kawllai sang kiphuan. Thuam Hang leh Pau Suan tui kiphum.

1907: Zogam bup Tuiphum Pawlpi khoppi masa pen Haka-ah kizang. Zomi (Chin hills) Pastor masa pen Thuam Hang. Manipur State Durbar kipan.

1910: Rev. Joseph Herbert Copte-te nupa Tedim tung. Cope topa in Tedim, Falam laimal bawl. Dr. J.H. Woodin-te nupa Khalkha tung. Pau Cin Hau Pawl “Laipian’ kipan. Chin hills-ah Sila kibeisak, Khua gamgi kibawl.

1914 Leitung Galpi khatna kipan, Tedim ah Thukizakna kiphuan. 

1915 Tedim Pau tawh Lungdamna Matthai bu kikhen.

1915-16 Halhka gamah Zusa laangin kial tung. Mizo pau tawh Thuciamthak bupi kizo.

1917: Piancit paina leh Galpi masa. CHIN LABOUR CORPS. German gal piang. May 25 ni-in Piantit (France) gam pai ding mi 1000 Tedim pan ding khia. Piantit paite London hawh. Labour corps, France-ah Ukpiapa Hau Cin Khup in mi tampi paisak zo ahih manin Mikang kumpi in minphatna KSM pia. Mi tampi Kawlpi zanggam ah lal.  

1918: Leitung Galpi khatna ve’ng ta. Piantit pai nuamlo Thahdo leh Khalkha in kumpi do. Oct. kha-in Piantit paite tung kik; 21 si, Piantit gamah kiphum.

1928: Chin hills-ah Chin National Union party kiphuan.

1942: August: Japan te’n Zogam leitang tung. Japan galkap 75,000 Kalgam lut. Kawlgam galkap 402,300 India-ah tai. Chin Army kiphuan. Leisan mualah thau zang lo-in temtawng tawh kido, Japante 150 liam, tampi si. Chin Hills-ah Mikang huhna tawh Japan gal a nang dingin CHIN LEVY kiphuan. Japan huhna tawh Mikangte do dingin CHIN DEFENCE ARMY (CDA) kiphut.

1943: Tedim, Halkha, Falam Japan in la.

Feb. 6-7, 1947: Representative meeting in Panglong, Shan state.

Feb. 12, 1947: Signed the agreement in the Burma independence.

Jun. 8-16, 1961: Shout Shan State Toungkyi Shan, Kaja, Karen, Muang, Zakhai, Chin held the meeting.

Mar. 2, 1962: New in coup the Govt. of Burma and destroyed the democracy laws. He ruled 12 years in the name of Revolution. Galkap te’n thuneihna, ukna buluh uh.

Aug. 8, 1988: Galkap ten thuneihna, ukna buluh, a nihvei na.

Feb. 1, 2021: Gambup democracy zia tawh suaikaihna mankhit ciangin, mee tanggu paulap in a thumveina galkapten thuneihna, ukna hong buluh leuleu uh hi.

Reference:

-   Zomi Khangthu: Zonet ah- J. Thang Lian Pau (2002),

-   Pu Kham Kho Hau ciaptehna,

-   Pu Hang Za Nang ciaptehna,

-   Pu Tun Pau ciaptehna

----------------