QIN (CHIN) DYNASTY (BC 221-206)
Gansu (Kansu) leh Shaanxi (Shensi) mun kikal pan hong khangkhia minam hi-in Zhou kumpi te nakpi tak nawngkai sakden uh hi. 256 BC pan Zhou te thanem mahmah kik ta a hihman in Qin te'n 475 BC a kipan minam gam 7 te a banban in zo-in 222BC in Zhao State te’ Dai khua kikapna ah zo uh hi. 221 BC in Chin Shi Huang (Shi Huangdi) in Sen kumpi masapen sem hi.
Qin Shi Huang (Shi Huangdi) hun sungin Tibet minam khempeuh leh adang mite in mat leh hen thuak uh hi. Tibet minam a hi General Meng Tian in a minam a hi Tibet (Qi) ninam te nusia in a minam galkap 90000 tawh Sen kumpipa nabel a Sen kumpi thahat tuam mahmah hi. General Meng Tian makaihna tawh galkap sila 300000 in Turkish nam Xiongnu te bang Sengam sungpan nitum nalam Takistan, Tajiskistan dong (Km 4000) tanbang bengkhia hi. A ciahkik lamciang a bengmang mite a lutkik zawhloh na dingin Sen kulhpi zong 214-213 BC in na ciangsak hi.
Hih galkap mangpa in a minam pih Qi te leh a dang Tibet nam khempeuh zothal mang in, sila in man hi. Hih a sila mat sungah Shing-mi te zong tampi tak kihel hi. Hih Sen kumpipa hun in kumpipa tawh a kipawl thei Tibetan mipil pawlkhat zong a kumpi inn sungah zangsuak hi. BC 2140-214 sung Sengam kumpi ki ukna sung khempeuh, gamsung thu leh kumpi thuvaihawm te sungah Tibet minam te ki helden hi.
Qin Shi Huang (Shi Huangdi) kumpi hun in Sengam sung Confucius sang pan mipil te leh a minam zui a laisiam mipil 460 val phumlum hi. A gamsung a saguh tung ki-at laite, savun tung a ki-at laite, sumgo laidal te leh a mun mun a om tangthu ciaptehna khempeuh zong a munmun ah kaikhawm sak in ni 30 sungin haltum ding thupia hi. A thupiakna a zuilo a-omleh a innkuanpih teng tawh thahlup ding in thupia lai hi. Tatsia leh gilo mahmah ahih man in a gammi te-in a min leh kumpipa cihdan in samlo-in, Ui ci-in minpia uh hi. 206 BC in Qin Shi Huang (Shi Huangdi) kumpipa si hi.
