ZI LEH PASAL NEIHNA
Tangval khat in a nungakte (apute’ tanute) a tenpih ding ki thupi sak hi. Beh numeite tawh kiten ding “Phungkhawm” ci-in ki deih masa lo hi. Tute tawh ten dign zong kideih lo hi. Beh sung nungak leh pute lam tangval kiteng ding “Seng kikhek” ci-in ki deih masalo hi.
Mopawi:
Nungak leh tangval kitengte aki ten ma in, “modong” ci-in nungak ii nu leh pate’ phalna ngetna kinei masa hi. Numei ii nu leh pate phalna a om leh kiten ding ni (Mopi ding ni) kiciam uh hi. Mopi dingte lam pan, “tamsii” ci-in numei khat leh pasal nih mo ding te inn ah, nitak nikai lamin ki kuan sak hi.
Tamsi numei pen tanu lam pan, tamsi pasal pen beh lam pan khat, pu lam pan khat ki sawl hi. Mopina ah “dotna” leh pina(puina) ci-in zuu belpi nih kipua sak hi. Zuu nek ding ciangin tamsi te-in, “Khuapih aw mozu hong siim un” ci-in khuazang zak dingin kiko hi. Tua mah bangin inn mozu kisim hi.
Mozu nek sungin tamsite-in inntek lam teng kikhawmin, mopi dinga akuan na thu teng pulakna nei hi. Tua khit ciangin inn tek lam unauteng mun khat ah kituah uh a, mo man gatang seh dan ding kikum uh hi. Aman uh ciangin tamsite tawh ki tuah uh a, mo manm gatang sehna kinei uh hi. Mo man sehna ah manpi, manno khenin seh uh hi.
Mo man sehdan:
1. Manpi - tuukthum khat pan sialpi khat ciang
2. Manno - 1. Nu puan: Puan dum khat
2. beh man: Ks 6/-
3. puman: Ks 6/-
4. min man Ks 3/-
5. Nung zuih man: Ks 2/-
6. Kan man Ks 10/- (a u mai a pasal neite)
Mo man ding gatang kiseh khit khuazan ciangin, tamsi te-in meide in’ Mo ciahpih ding kipan uh hi. Monu in a zotsa a inn lak sanggam nungak (behnu) khat tawh kikhawlin, tamsii te hong zui hi. Mo’ kikholhpihnu pen “mo-nungzui/mo-liah” kici hi. Pasal nei khin, mindaina nei khinte peuhmah mo nungzui ding in kizang nuam lo hi. Monu in aki pi ding nitakin, amite ahih kei leh apute inn khat peuh ah anungzui ding nu tawh nma hawh uh a, mo ciah ding hun ciangin tamsite in sam uh hi.
Mo ken dingin zuu belpi khat, seeng khat, hei khat, tu khat, tem khat, puanza khat kiguan hi. Mo ken kici mokhakna teng pua in tamsi te-in mo ciahpih uh hi. Mopite kong hong tun ciangin tamsi khat in, “Hong ciah ung ei, ci dam mulmam in hong ciah ung, tanu tawi tapa tawi ding, mimtho tangtho ding sumlam siallam dingin hong ciahung,” ci-in hong kiko hi. Tua ciangin innteek pa a hih kei leh akisehsa behpapi khat in tamsipa cih teng zui in, Hong ciah un ci-in dawng hi.
Innliim hong tun ciangin mo-ken teng sangin inn sung sutnuai ah mo tumpih in ki tutpih hi. Mote’ hong puak zuu leihpah hi. Behtulpipa in zuuphih a, ataak khit ciangin abanbanin mozuu kine hi. Beh tulpipa in “monu’ phungtanna” zong bawl sak hi. Phung tan nadingin, “Ak no saan” ci-in zuuphih in aklui san khat kigo hi. Aakno saan / phungtanna bawl khit a kipan monu in apasal ii beh min tang ta hi.
A zingciangin mo khate ‘inn ah, “tamsi vak” ci-in mopite’ inn ah, “Aak mittang” ci-in lungdamtak gualnuamtakin khuazangin ki-om hi. Tuani mahin moman gatang kisehteng, tamsi te-in vapuak pan uh hi. Tamsi vakna pan annek khit ciangin, tamsite ak mit teng (mopite’ inn) ah hong ciah pan uh hi.
Tamsi vakna ah “tamsi kuang” ci-in tamsite mi phazah sakuang kipia a, amah ii it leh ngaih teng an umpih uh hi. Tua mah bangin aakmittan na ah tamsite sakuang kipia hi.
Zineipa a khanngual tangval te-in zuu, sa sik thei uh hi. Tua bangin a sik a om leh amau zi neih hun ciangin asik bangbangin kithukkik uh hi. Mopawi sungah khuang leh zamte kizangeilo hi. Mopawi bek hilo in, nopan lungdamna pawite ah kilungdampihna ci-in inn apai peuhmah in zuu leh an neih bang ciat ki tawi hi.
