U LEH NAU KIZOPNA
Innpipa (inn luahpa): Unau nih le thum phate-in zi le ta a neih tek uh ciangin, a u pen lobuang abanbanin innthak bawlin inntuan uh hi. A u pen in innpi (apa’ inn) ngakin, “innluahpa” “innpipa” kici hi.
Tanu: Pasalte inn a tuan khit uh ciangin nopna dahna ah inn a nasem dingin amau laizom sanggamte leh, abeh sanggam numeite (akhaksate) nga teelin, “Tanu” ci-in min vawh uh hi. A u pen thum teng” tanupi ci-in aneutegel ”sabawl” kici hi.
Sih hun ciangin tanupi thum teng “Si tuamte” kici hi. Si tuampi nu in misi numei ahih leh tawngnok, pasal ahihleh puanza laisan tawh tuam hi.
Thalloh: Pasal te-in inn atuan khit ciangin, nopna dahna ah thu a kikippih a vaihawmpih dingin, beh pasal li teel, a” Thalloh” kici hi.
Tangpu: Pa’ pianna nu ii pate (pa’ pute) “tangpute” kici hi. Ama’ pianna anu ii pate “pupate” kici hi. Samat leh sihna nopna a akigo sangawng peuhmah pupate kipuak hi.
Pute: Ih pianna nu ii pate (nu’ nungsang te) pen pute kici hi.
Sungh: Zi ii pa leh a beh lamteng, “Sunghte” kici hi. Tate a dingin “Pute” kici hi. Sungh lamte ii ziteng pen tate’n “Pite” ci uh hi.
Nuphal: Zi ii sanggam numeite leh apasalte “Nuphal” kici hi.
Nungsang leh Masang: Zi ii nu-le-pa te’ beh lam teng zi ii “Nungsang te, zi ii pasal beh lam teng “a masangte” kici hi.
Ni leh Gang: Pa ii a sanggam numeite (beh numeite) “Nite” Nite pasalte Gangte kici hi. Pa ii sanggam numei a u pen “nipi” kici a pasal zong gangpi kici pah hi.
Papi leh Nupi: Pa ii sanggam pasal upen “papi” a zi pen “nupi” kici hi.
Nutaak, pataak: Nute unau numei u-pen “Nutaak” kici-a, a pasal pen “pataak” kici pah hi. (midangte’n nupi leh papi a cizong om uh hi)
Thusa: Nopsung, dahsungah thuvan thukan ding akiseh veng pasal tangzang te “Veng thusa” beh pasal tangzangte ”beh thusa” kici hi.
Nungak: Pute lam numeite “Nungak” kici hi.
Tute: Tanute ii tate, nite ii tate khempeuh “Tute” kici hi.
Maak te: Tanute leh nite ii pasal te, “Maakte” kici hi.
