TUAL THOIH

Tualthoih cihpen guahtui ngetna hi phadiak hi. Tua ahih man in thaipawizawh May kha beilam in nikhat kibawl hi.

Guah zukna ding, anno hoihna ding, khuasung cidamna ding, huihsia, minsia, patau kangmei omloh nading akibawl ahi hi. Bawng ahih kei leh vok tawh tual thoih na kibawl hi. Tual thoih na sa aseh in khuazang ah kihawm a, a zingciangin khuazang in tual dawi tangin inn ki-om hi. Tual dawi tanni in khua sungah zin (khual) ki lut sak lo hi. Tual ah zong kuamah ki pai theilo hi. Tualsa ne teng bek ngeina sung a omin kiciamteh hi.
Guah azuk hak leh tual thoihna nungzuih ci-in tual thoih kik uh hi. Guah a zuk theih tuan kei lai leh “Suang meinei- khua biak suang” sawl tawh siin in tui buak uh a, guah ngenthei lai-uh hi.

Abawlna: Vokno khat tawh bawl a, kum thum simin ganpi khatta tawh kithoih hi. Athoihni nitaaklam in tualah kigo ngiat hi. Asa pen Tualteek in aphei meibang, Tual phuisampa in aliang khat, tual tanu te akawng kipia a, taangpite abaak in, innkim ah kihawm hi. Tualteek in tual ah zuu beel khat luup a, Tual phuisampa in tua zuu teepin phih a,

a)   Tuntawng khuasah nasiam in, Tun Lam khuasah nasiam in, Mang Hill khuasah nasiam in, Phut Lam khuasah nasiam in, Suan Tawng khuasah nasiam in, Haunung ta, Naulak ta, Suante ta, Tomu ta, Namzo ta in, cidam, mulmam, hongngen hi. Miimcii taangcii hongngen hi, Sumnu sumpa hongngen hi. Guahtui thum guahtui al hongluan in.

b)   Minsan miimngo, Kammei patau tawh hong kipelhsak in, pulpi zavat, dawisia, kausia, huihpi guahpi tawh hong kipelhsak in.

c)   Galmang honghawl in, samang honghawl in, ci-in phui asam hi. Azingciang pen tual dawitanni hi-a, tual ah kuamah alut loh nading in khauthung in sawlkai in kikhakcip hi. Khuasungpan in a paikhia ding ahi zong, apualam pan hongtum ding a hizong in ki deihlo ahih man in, Thangnuai lampi, Zungkhua Lampi, Suangpi lampi te kikhak hi. Asungtum apusuak aom leh Tualthoihna beiteng lulsak ding a, Tual kithoihkik ngiatding kici hi. Khua kantan a painuam teitei te-in gamsung tawnin na paisim khiankhian hi.

Tualdawi tanni in mui namsak lo ding, lei ngilsak lo-in, sawl sisak lo ding hi. Sial leh bawng, sakol te zong lo kikuansak lo in, an lawh in ki khumcip hi.

PHUNOM MUALSUANG | Page 31-32