THUNUN

Thunun ih cihpen tulai khangthak pau-in cileng pawlkhawm, thungetla, lungdamko cih tawh kibang hi. Lungdamna tawh ngeina leh ngamtatna kibawl khempeuh “thu nung” ki ci hi. Ton zongtawh kibang dektak napi ton pen biakna tawh ki memat zaw a, thunun pen ngeina lam hizaw hi.

Thunun sung ah a ki hel aihna te-in (a) Ngal aih (b)Sa ngual aih (c) Saai aih (d) Sial aih (e) Sahang aih (f) Cingh aih cih te a hihi.

Gal leh sa-aihna zuu leh sa tawh kibawl gualnopna ahih manin ‘zuu-nun’ zong kici hi.

Deihna bulpi:

1. Gal leh sa-aihna

2. Damlote mangisate kikhakhupna
3. Si phutuahna

4. Luup leh huan min deihna te…. ahi hi.

Gal mante galhang, sakap te ngalpi 1; luup leh huan zote mihau kici hi. Gal-ai sa-aite tungah tuate sa-in siatna tut zolo hi, cih upna zong om hi. Tua ahih manin pu leh pate in “zunun” ding hanciam ciat uh hi.

Damlote mangsiate, aki mang siatte damna angah na ding laihna in “kikha khup” ci-in zuu nung uh hi. Misi neite in amisi uh akha in haksatna pan suaktak na ding deihna tawh “Si phutuah” cih in zunung uh hi.

Gal-ai, sa-ai, lo-a a si pasal peuhmah ki minlawh theilo hi. Gal-ai sa ailo a a si mi aki min lawh theih na dingin ci tapa (Siampipa) in aklui khat go in “maltang” kici gal–aih sa-aih na lim bawl sak hi.  Tua hun ciang bekin a si mipa ki minlawh thei pan hi. Galaih, sa-aih na pen pasal taktak kisim na hi hi.

Pasal khat inn atuan khit ciangin zunun, (Gal-aih, sa-aih) khatvei bawl hamtanga, tua pen “kun siang” kici hi. Zuunun kipat cilni “pansikni” kici a a zingciang “kheklehni” kici hi.  Kheklehni atawpma in aak akhuan leh hoih lo hi ih upna om hi.

Akisa late:

1.Hanlap la 2. Hantang la 3. Galla 4. Zangta la 5. Sa la 6. Saulen la 7. Sakhaal la 8. Sai la 9. Hangthawlla 10. Valuk la 11.  Sawng la 12. Sial la 13. Vaphual la 14. On Hong la 15. Gual ngaih la   16. Aak la 17. Sungtum la 18.  Inn sung la 19. La gualnuam 20. Zola

PHUNOM MUALSUANG | Page 35-36