THAANHO THU

Nidang lai in ih pute ih pate in THAAN neilo-in asih ciangin leiheng suangheng zongtawm in tuate sungah kihui uh a, tua aki huina pen thaan na ci-uh hi. Mi pawlkhatte in a misi luang thaan sungah sialpah lo-in kuangsung ah sialin thaan pualam ah akuang in akhang uh hi.

A thaan uh kanga anu apate api apute’ guh akaakding a launa in kumsim in gamkaak theihma, February kha sung in nikhat ni-in a thaan uh ahozel uh hi. Tua ni-in amisi te uh zuu peuh an peuh apuak uh hi.

Leiheng suangheng sung a kisialte a hi-a, Thaan pualam a kuangtawh a ki khaangte a hizong, muat a aguh teisa te hih THAANHO ni-in mal in, alu thaansung ah koih in aguh dangteng pawlkhat in lei-ah phumin pawlkhat in meitawh a haltum lel uh hi.

Hih Thaanho ni in Phunom daihualsung a om mikhempeuh in Sawlsilo ding, Leingil suahlo ding, Mui namsaklo ding, niik leh puanzong sillo ding, khuilo ding, khau limlim zong hihlo ding, kici hi. Hihlo ding a kici te khat peuhpeuh a hihtha te a hi a, a hih kaltangte a hi zong in, mei in kangthei hi, kici hi. Aneubel in sunpuan zanpuan khat peuhpeuh kangthei hamtang hi, kici a, zong mantakpi hi.

Thaan kangleh guahtui hangh(tawm)gawp a, kizawnggawp thei hi, cih upna zong akineihman in thaanho ding a ki thupisak phadiak zong a hihi. Thaanho tan pen – zingsang nisuah leh nitaak nitum kikal teng a hihi.

PHUNOM MUALSUANG | Page 37