TAPIDAW (KHRISTIAN) BIAKNA
1928 kumin Phunom khua ah, kumpi Zolai tan 4 sang kihong hi. Sangmangpa J.H. Cope in sang avan kawmin Sia Thuam Hang tawh kithuahin khasim phial in hong pai hi. Dalpau (gramophone) leh Lai Siangtho limte zangin Pasian’ thu hong gen hi.
Dalpau kizanuam mahmah ahih manin, khuazang bupbupin a zintunna hausapa Pu Sum Hang’ inn ah kidelh hi. Tua bang ahih manin inn zai penna hauspa inn leh Pu Son Kam’ inn ah kikhopna kizang zelzel hi. Dalpau ahon pahpah loh ciangin, “Na dalpau bawl mengmeng in na mukmul siausuau tawh zawhngeu tal bangin ah….” Peuh ci zanzan uh hi. Dalpau hon aman the, “Sumhaupa leh Lazarus lim, mei kuangpi lim te lakin, “Pasian biate vantung tung ding, dawi biate mei kuang sung tung ding,” ci-in thugenna nei hi. Meikuang sung a tung nuamlo te tapidaw a suak uh ahi hi. Tapidaw a suak uh leh zuu nelo, dawi bia lo, dawi biakna sa neilo, sihbuina sa neilo, nipini tangin sawl silo (nahteh lo lo) uh hi. A ut leh tui kiphum pah thei hi.
1930 kumin Pu Kam Thang, Pu Neng Za Ngin, Pu Lam Khaw Ngin leh Pu Khai Cin Thang te-in Pasian thu na sang uh hi. 24/3/1931 kumin Pu Kam Thang Rev. J.H. Cope’ tawh Bualkhua (Falalm gam) ah tui kiphum hi.
Tuiphum Pawl (American Baptist Mission)
1930 kum pan Phunom khua ah “Tuiphum Tapidaw Pawlpi” hong piang ahi hi. Biakinn thumvei kilama, amasa biakinn (24` x 18`x92`) 1946 kum December sungin Sia S.T. Hau Go kihong sak hi. A nihna biakinn (42’x24’x12’) 1952 kumin Rev. Mang Kam kihong sak hi. A thumna leisek biakinn (48’x24’x12’) 1981 kumin alam ki zo hi. 9.2.1986 kumin Phunom khua ah Pasian thu a tunzawh kum 50 cinna, Golden Jubilee min tawh Rev. Son Khaw Kham (TBA-GS) kihong sak hi.
February 6-9, 1986, kumin KVLMTB kumcin khawmpi kibawla, anuai thu um mite’ min tawh Phunom khua a’ dingin amasa pen Jubilee daak kisat hi.
Jubilee-late Jubilee kum Jubilee min
1. Pu Neng Za Ngin 1931-1988 Golden Jubilee
2. Pu Lam Za En 1937-1988 Golden Jubilee
3. Pu Kai Khaw Thang 1940-1988 Goden Jubilee
4. Pu Thuam Kim 1940-1988 Golden Jubilee
1930 kum pan Pawlpi kem siate anuaia bangin kiciamteh hi.
Pawlpi kem sia Pawlpi kep hun
1. Rev. Lian Zam …… 1930-1937
2. Rev. Thuam Hang
3. Rev. Thang Lian … 1938-1946
4. Rev Mang Kam …. 1946-1960
5. Rev. Hau Do ……… 1960-1966
6. Rev. Thang Kam . 1966-1987
7. Sia Kham Cin ……. 1987-1995
8. Rev. Kam Cin Mang … 1995-present
R.C Pawlpi:
1958 kumin Pu Thang Khai RC pawlpi sungah na lut hi. 1976 kum in St. Joseph Biakinn (66’ x 24’x 14’) lam kipan a, 14. 5. 1978 kumin Thupha piakna nei hi. 1988 kum pan Sia Khai Lian Mang in pawlpi kem hi. October 15-23,1994 kumin Saizang Perish thusinna leh khawmpi Phunom khua ah kibawl hi.
A.G Pawlpi:
April 11- 16, 1978 kum sungin Tonzang pa’n Sia Hau Thang in Ngen Za Thawng, Sia Thang Khen Zam, Sia Thawng Za Tuan, Sia Thang Do Khe, Sia Hen Za Kap, Siama Uap Za Cin leh Lia Uap Khaw Zam, Lia Go Ciin te hong pai in Tuiphum pawlpi sungah masa pen gup khiatna thu tangkona leh thusinna hong neih pih uh hi.
Tua hun pan kipanin, gupkhiatna thupha puak a nini in hong tungtung uh hi. Biakinn kizang lo in Pi Dim Khaw Luan’ inn, Pu Tun Sing inn, Pu Kham Kam inn, Dimzang ah Pi Cingh Za Niang’ inn Pu Dam Zam’ inn te Pasian’ Thu genna leh biakpiakna in kizang hi.
Rev. Hau Lian Kham, Sia Gin Za Lian, Sia Go Za Nang, Sia Khai Khan Suan, Sia Suang Za Dal, Sia Chin Khua Khai, Sia Thang Hum, Sia Thuam Khan Thang, Sia Do Cin Pau, Pa Liing Za Thang…etc. te-in veina tawh hong pai sia leh upate ahi uh hi.
May 1, 1980, kum ciangin Thuklai pan Rev. Dam Suan Mung (Sia Mungtawng) Siama Vung Za Niang te makai in anuai a thu um mite A.G pawlpi mi a saanna leh A.G pawlpi phuhna nei hi.
A.G pawlpi phut te: 1. Pa Dam Zam 2. Pa Thawng Khaw Kam 3. Nu Ciang Luan 4. Nu Sian Cing. 5. Nu Nem Ngaih Cing 6. Nu Dim Za Luan.
1986 kumin biakinn (42’x24’x18’) khat lam uh hi. February 3-6, 1994, kumin Tedim Section AG kumcin Crusade a (17) veina, Phunom khua ah kibawl hi. September 10,1995 kumin PAG pawlpi pan BAG - Dimzang Pawlpi inn tuanna Rev. Tuan Suan Dal (Sec. Superintendent) in pawlpi kipsakna nei hi.
UPC Pawlpi:
1984 kumin UPC pawlpi inn 6 om a tu in inn khat om lai hi.
Yahweh Pawlpi:
1986 kumin Yahweh pawlpi upna Pa Hum Khaw Kam in sanga tu in thu-um mi 3 om hi.
E.B.C Pawlpi:
1991 kumin EBC pawlpi Pa Thawng Cin Suan in la a tu in inn 3 om hi.
C.B.C Pawlpi
1994 kumin CBC Pawlpi Pa Dam Zam in la aa, tu in bei kik hi.
E.C.C Pawlpi
1995 kumin E.C.C Pawlpi Sia Thawng Cin Lian (P/Hm) in la-a bei kik hi.
Canaan Tuiphun Pawlpi:
1996 kumin Pa Suang Khat Thang in Phunom Canaan Tuiphum Pawlpi, (Z.B.C.M) phutin tudong kip paisuak hi.
SDA Pawlpi:
June 1999 kumin Sia Suan Sawm Sang leh alawmte hong pai in Pa Lian Khan Dal te inn ah nipi 3 sung Pasian thugenna nei-in inn 8 S.D.A suak uh hi.
PHUNOM MUALSUANG | Page 43-46
