SILA KHAWI BEINA
LEH
SAPHEI SALIANG KAIH BEINA
Mikang kumpi hong khanma in hong ukding vuandok mangpi cihbang omlo-in khuakhat leh khuakhat inntung innnuai galin kido in innteng sila in kikai in, saphei saliang kikai in, miimsiah taangsiah a ne-uh hi.
Phulum phulnading leikha in petket a kicihmah bangin 1923 kum phalbi ngaat laitak December kha sungin Phunom khua ah Pu Thual Kam tong a, aton saliang atopa Mang Suang apiaklohna hang in tua hun laitak a ukpi asem Hau Cin Khup (Tonzang), Pau Ko Mang (Mualbem), Khup Lian (Lophei), Lian Hum (Khuasak), Hang Ngo (Limkhai) te tawh kipawl in Mang Suang in thuphuan a, Falam mangpi zumdong kitun hi. Pu Thual Kam pen Pu Kham Kam, Pu Kip Ngin, Pu Ngen Tuang, Suangpi Pu Son Khai, Pu On El, Pu Lam Ko Thang, Pu Dong Kang (Zung), Tuitawh te Pu Dong Cin te-in taangpi tangin na panpih hi. Hihthu khuapi ah sit a, Pu Thual Kam in a zawhman in D.C zum panin, “Tupan kipan England kumpi ukna nuai ah kuamah in innteeng sila khawithei nawnlo ding a, saphei, saliang, siahtung, siahphei, kaithei nawnlo ding hi,” ci-in thu hong thangsak pah a, 1924 kumsung mah in To kisuutna omsak hi. Ahi zongin Pau Ko Mang pen a thuneih sungin si-a, azi Ton Cing in innteng sila kaihna leh saphei saliang kaihna te beitaleh, ko ka nuntaakna uh hamsalua a hihciang in miim leh tangsiah hong ngahsak lai-un, ci-in kumpi tungah a siauh manin kumpi in miim leh tangsiah angah theihlai nading in phalna thu pia a, tua miim leh tangsiah pen Kawlgam in suahtak (Independent)ihngah, 1948 January 4 ni dong kipia hi. (Thual Kam, Kham Kam, Ngen Tuang, Ngin Thang, El Cin)
PHUNOM MUALSUANG | Page 95
