SANG NGAHNA
1924 kum pan kumpi in Missionary J.H. Cope, Zolai sang hong zuak kawikawi a kuamah in sang zolo hi. 1928 kum ciangin Phunom khua hausapa Pu Lam Thawng in nasang a, 12/6/1928 ni-in Siapi Cin Ko Ngin in hong honsak hi. Amin in kumpi in Sang hongpia ahih hangin, sia hong cialsak hibek a, Sanginn ding hong ngelsak vetlo hi. Tua ahihman in Pu Thual Kam in Ciing a longam sungpan Sanginn dingin Taaksingkung lian 45 hongpia a, tuate sui-in, atin Sanginnpi (20’x20’x7’) in kizang a, Taudawh mualtung tengah kilam hi. Asing avallai teng Taampi ah (20’x20’x7’) Buzung in kizang hi, ci-in Pu Son Tual, Pu Khan Dai, Pu Kham Kam te-in gen hi.
Sanginnpi pen a tungah Bi kilam a, nitumna lam maipeek teng alam nading Bi Zung Khua te-in tavuan la hi. Asaklam pang a lamnading Bi Dimpi Khua te-in tavuan la a, athunglam leh nisuahna lam maipeek pen Phunom Khua in tavuan la hi. Sia-inn khat atung alam ding Suangpi in tavuan la a, siikkang tawh khuh hi. Adang sia-inn khatpen Thangnuai Khua in tavuan la-in, Suangpeek tawh khuh hi.
Hih Sanginn sia-inn te kum 1955 kum May kha dong Taudawh mualtung ah kizang hi.
Private Middle School Ki Hong
AD 1942 kumin hausapa Hang Za Cin hong si-a, Japan gal hong tungding ci-in ki gengen khinzo a hih manin ama tanga galsung a hausa semding kuamah ki-ut masa lo hi. Tua ahih manin galpi sunga omzia kikepzia gamtatzia ding athei zawdeuh dingin galkap sunga om kimlai Pu Son Lun in Relief a hausa hongsepna dingin kihopih in, SDO Tedim tungtawn in a Batalion ah kingen a, phalna a kingah bangmah in, 1942 kumlang pan kipan hausa hongsem hi.
Hausa hongsep peuhciangin koimapeuh ah manglai kisapna mah genbelhin nei-in khangnote hong hanthawnthawn a, khua-ah manglai sang photding lungngulh lianbel in hong nei hi. Tuabang a ahanthotna tawh kizui-in U Suak Za Thang in 1945 ki kipat panin a inn ah Night Study hong phuan a, tangvalte tammahmah kikah hi. Hausapa Pu Son Lun lungdam in tuahun laitak a Zolai siapi hongsem Sia Phut Thang tawh hong kikum in, Zolai sanginnpi sung anunglam khanno khat ah, 1/8/1945 nipan Manglai tan 4 kipansak in U Suak Za Thang Manglai sia semsakpah hi.
Tuahun in Pakzang pan Ngul Ko Thang leh alawmte 3 hongkah pah hi. Amaikum 1946 ciangin Zolai sanginnpi sak a sikkang kilam sia innno sungah Manglaite ki kahsak a, U Suak Za Thang leh Suangpi te U Tual Za Suan in sia hongsem hi. (Hausapa Pu Son Lun in “kakhua phalloh khua, do-in sawm a, kakhua phalloh khua, do-in sawm a, kakhua phakloh khua gualtawh tanbang kimsaknuam ing e,” a ci hi.)
1946 kum kipatlam in Hausapa Pu Son Lun in, tu-in galzong vengta ahihciangin keizong Batalion vazuan ning, a ci hi. Tua ciangin khua upate-in hausa ding galkap sunga omlai, Pu Hang Za Nang mah ngenkhia a, 1/10/1946 ni khuado muallaamni sunin hongtung hi. Tua October kha beiciangin Pu Son Lun in a hausa tavuan teng Pu Hang Za Nang tungah aap in aman’ battalion vazuan pah a, Pu Hang Za Nang in Hausa hongsem pah in, Private Middle School zongah ma hongpang pah hi.
1949 kum ciangin SHS, Thuklai a kahding aa, a paisa sangnaupang 17 te hausapa in samkik in KBC pastor Rev. Mang Kam leh Phunom Tapidaw upate phalna tawh khuamual a kilam Tapidaw Biakinn sungah manglai te kikahsak in Suangpite U Ngul Za Thawng leh U Tual Za Suan in sia hongsem hi. A sawtlo in U Tual Za Suangalkap hongtum a, tua ciangin Ex. Capt. Neng Za Ngin leh U Ngul Za Thawng in sia hongsem hi. 1949 August leh September kawmin Sia Ngul Za Nang hong nangawp a, ama sangkah zawhloh khakhat sungteng Hausapa Hang Za Nang mah in လုပ်အားပေး sia hongsem aa, a thaman ding sum ngenlo a hihman in Sangnaupang te-in a Ngaal lo thakhattek in a thawhsak hi.
Siate-in, Pawlpi in zatkhuan hongpia ahiteii tazong in Biakinn sung taktak sanginn a ihzat ciangin a nopmawh nakhat omzel ven, Sang board te, nulepa te-in sanginn ding mahmah hong hanciam un, hong cihcih ciangin Hausapa Pu Hang Za Nang mah in laingial thung, ama longam sungah Sanginn lam nading mun hong piapah a, lungdam in a ziikding in khuazangin kikuan in kiziikpah a hihhang in amun ziikhaklua ding a hihman in kuamah in tha ngahlo in ki tawpkik hi.
Tua ahihman in, 1950 kum kipatlam in Thangnuai ateeng, Sia Mang Kam in Dimzang tai ngei, ama longam sungah Sanginn lam na ding munhoih khat hongpia a, Manglai sangnaupang te-in sangkhak peuh ciangin amun ziikpah in Sanginn dinga a kisam Sing, Ngua, Bi cihte zongpah siasua in atungah Bi lamin Tukpeek tawh uumpah hi.
Sanghong ciangin sangnaupang te-in amau tek ii zatding tutpha sabuai kengin 1950 kum June kha pan tua alamthak sanginn sungah Manglai Tan 7 dong kikah hi.
1950 kumin Ex. Capt. Neng Za Ngin in sang cingkawm dingin Tuicing deek ah hong teengto hi napi, 1951 kum November kha in hong nusia pah hi. Ama sihzawh ciangin a-upa Kai Khaw Thang in anau Neng Za Ngin ii a huangbup lociing khat sanghuang dingin hong piathong hi. Ki lungdamtek a hihman in hong piakpeuh ciangin Dimzang taii ngei-a akah Manglai sangnaupangte bangin a sun sangtuahsungtaa leh Friday nisim in sun sangtuah pan nitaak nai thum dongtaa Bu Neng Za Ngin ii a huanthang tuicin theihna kom sungteng Sangtual dingin lei ahukhuk pah hi. Athang a mualtung tengzong sanginn lamna dingin ki ziiktam pah hi.
Tuamah bangin sanginn a lamding in Sia Mang Kam ii Dim Zang a longam sungah Leiseek kiseek a, Bu Neng Za Ngin ii a huanthang Mualtung ah “E” ပုံ in taih innpi khat (96’x20’x10’) in kilam hi. Hih taih innpi pen kumpi ii huhna tawh a kilam hilo-in Thaangsung Thaangpua, K.Y.A te hanciamna tawh akilam hi-a, 1955 kum sangkhak sungin zattheih dingin kizo ahih manin 1955 kum June kha ni 1 ni panin Phunom Taudawh mualtung a kilam Sanginn a kah Zolai te leh Dimzang taii ngei a kah Manglai te kingawm in a ki lamthak taih innpi sungah ki kahpah hi. Phunom Taudawh mualtunga kilam sang-inn sia-inn te a kizang theilai teng Tuicing ah sia-inn border inn in kizang hi. Zogam sungah Sanginn in Taih inn a kilam masa bel a hihi.
Phunom, Provate Anglo Vernicular Middle School a kici pen 1966 kum April ni 5 ni ciangin kumpi in Pyitupai Middle School in hong ciaptehsak a, sia hong cialsak pah hi. Tua Pyitupai Middle School Tan 7 sangpen, 1970 June ni 5 ni ciangin Tan 8 sangin hong ciaptehsak a, Middle School Headmaster dingin Thuklai te C. Mang Thawng hong puakpah hi.
1991 kum ciangin hausa te-in Phunom khuapi panin tu-a ka sanginn uhpen Taikhat valbang gamla a Mulah sangnaupang te-a ding in hamsa deuh ven, Phunom khuapi sung mahmah ah Mulah sangkhat hong honsak zo le-uh cin, ci-in kisiau a, 1991 August ni 21 ni ciangin Kumpi in Phunom khuapi sung mahmah ah Primary sangkhat hong honsak a, Sanginn zong hong lamsak pah hi.
High School Ki Hong
1993 June ni 1 ni panin Phunom Middle School pen Private High School (တွဲဘက်) kiphuan a, Sia Ngin Khua Cin in hong makaih hi.
2007 kum June kha ciangin tua Private High School (Affilicate) pen kumpi in Brand High School in hong ciapteh sak a, S.A.T 6 zong hong puakpah hi.
2013 kum ciangin tua Brand High School pen kimpi in High School (Tan 10 sang) in hong kipsak a, 3/6/2013 ni-in Sial khat leh Vok khat tawh honpawi kibawl hi. Hong honsak ding mundangpan ulian hongpai omlo ahih manin Siapipa U Vung Sian Piang, Ohsuh Ohkathah U Lun Za Kai leh Sang Committee U Eng Cin Pau te’ khau atsat na tawh tan 10 sangpi kihong hi.
Note: 2003 kum November 4 ni-in Phunom khua ah sang ngahzawh kum 75 cinna Sialtal khat tawh Diamond Jubilee pawi kibawl hi.
PHUNOM MUALSUANG | Page 96-99
