PHUNOM YOUTH ORGANIZATION (P.Y.O)
Phunom Youth Organization (P.Y.O) Kipatna
1952 April 19 Saturday (Nino)nitaak in U Tuang Za Cin in “Phunom khangnote a ding in thu phamawh mahmah khat hongtung in tua thu kikum dingin tu nitaak nai nguk in Buzung ah khangno khua ngeihsun theisa khempeuh ki kaikhawm pak ni,” ci-in hong tangko a, bang thuthak om hidiai ci-in khangno a hithei zah kikaikhawm litlut uh hi.
Kikhop kipat peuh ciangin U Tuang Za Cin mah in “Tu nitaak a kong meeting sapna pen nong thupisaan uh a, a hun laplian a nong tunkim mahmah uh ka lungdam peuhmah hi, kong kohnop thupen thuthak lua zong hilo hi. Thului luah un kilaplo ding cihzong lah hisaaplo hi. Banghiam cihleh, ka ommuan a khua kangaihsutsut ciang in hih Phunom khua pen eikual a dingin a laisaan bel a hihban ah kumpi zolai sang omna hi-a, tu-in manglai sang phuan in gamla pipi pan in zong sang hongkah omding uh hi. Ih ngamtat ih kampau nate pan a kipan ih hoihna ih hoihlohna, ih nitna ih sianthona te khempeuh khuadang te-in hong muhciangin, sang onma mahin omei hong cileii tam, a hih keileh lawmlawmbuang hong cizaw tam, ka nacici hi. Banghanghiam cihleh zingsang tuung in khuasung ah vakkhia lehang papi te-in a zanpuan silh khilkhel in a innkaadawn pan a vokpi a voktal neekding in a eektha tampi ihmulai hi. Tuamahbang in nupite-in zong asialkong ah a niik singteen a kawnglam ah kaito lai-in awn khiinkheen in a zingzun hongtha a enngam lehang aseel teng a kimu ding hilai hi.
Mun khatkhatte ah a inntungte ii eeksiakna ciankangte a innnuaite ii inntual khawng, lampi khawng ah a kikholsuk nihneh ih mutek hi. Tua banah ih tuinakpi khawng va-en leng siakin na tanngawp in sialzun sialeek tawh kidim in munkhatkhat te-ah Naal eek san demdam tawh kidim I mutek hi. Ih khuasung kongzing lampite ah, minih ki paitheh theilo a, a toilua zong na-om kawikawi thong hi. Hihte pen hausa upate-in a mulo atheilo lah hilo di a, hoih asa lah hi tuanlo ding a hihteh tu-in ei khangnote-in koici ngamtat leng hoihzaw in ih kikhelthei dinghiam, cih kikum khawmni, ci-a hong kaikhawm hi-ing,” hong ci hi.
Tua nitaak a ki kaikhawm khempeuh in U Tuang Za Cint hu pulaak te pen a muhtek uh hi-a, hoih asa khatzong omlo a hihhang in, tuaci ngamtat leng hoihdinghi, a cithei kuamah omlo a hihman in a kikhawmte lakpan a uppa zawdeuhte-in Nangma’n na ngaihsutna zah hong ngentolai dih in a ci hi.
Tua ciangin, U Tuang Za Cin in, “Hihthu te pen Hausa, Upate-in a mulo a theilo lah hilo, hoih asa zong hituanlo dinghi, ci-in ka ngaihsun hi. Tua ahihciang in khangnote-in ki pawlkhawm in ki pumkhatna khat nei hanga, hih a etlawmlo pawlte hausate phalna tawh thuhilh a phiatmang ding leh ih tuineek pan a kipan khuasung lampite siantho nading mahmah semleng a-ut hiveng aw,” hong ci hi.
Hihthu te ki thukim theitek a hihman in khangnote kipawlna minding kikum a, Phunom khangnote kipawlna (Phunom Youths Organization = P.Y.O) chiding in ki khensat pah hi. Tua kipawlna P.Y.O ii Tup leh Ngiimte zong hih anuai-a bangin ki ciamteh pah hi.
P.Y.O Aims and Objects = P.Y.O Tup leh Ngiimte
I. To keep up clearing the interior and exterior of the village.
II. To love and defend our nationality and have self-mindedness.
III. To defend out village affairs with unity.
IV. Honor your elders and support to your pity.
V. To built Khuano Youth Organization = (K.Y.O) stable and forward
VI. To have a General Merchant for K.Y.O.
VII. To function and raise any progress, activities, and development more and higher.
VIII. To raise clinic and Information.
IX. To try maintaining circle and snatch betterments from outside more than the present income
X. To shoulder out utility to the Goal. Ci-in Constitution ki thung hi.
Hih thu khempeuh Hausapa kiang ah တင်ပြ a thukimpihna a va ngending vekpi taang in,
1) U Tuang Za Cin
2) U Kam Khua Lian
3) U Tun Pau
4) U Lam Khua Lian
5) U Tun Khan Thang te kiseh hi.
Tua a kiseh tengmah 25/4/1952 Friday nitaak ciangin Hausapa U Hang Za Nang kiang ah pai-in Phunom Khangnote Kipawlna (Phunom Youths Organization = P.Y.O) ci-in kipawlna khat photnopna leh tua kipawlna tawh tulaitak a ih tuineek tuibul mun nga (5) teng leh kongzing puahphat nopna ateng ava တင်ပြ leh hausapa na lungkim mahmah a, manlang a khangno kipawlna photding leh seplehbawl ding a na ngelna te-uh zong hong sempah un. Khuasung napuahna uhtawh kisai in thubuai omlo ding hi. Kongzing leh huangneite kiang ah zong ka gengen sa hi. Na lau-uh leh na sepnini un hong zasak un, councillor te khatta hong paisak ning,” hong cilia hi.
Tuamah bangin 26/4/1952 nitaakin khangno khempeuh Buzung ah kikhawmkik in Hausapa kiangpan thu ngahnate ki zaksakna leh Phunom khangnote kipawlna minding Phunom Youths Organization (P.Y.O) cihpen kipsakna kinei hi. Hih hun a Phunom hausapi pen U Hang Za Nang hi-a, Village Councillor pen U Ngin Khua Thang, Pu Thual Kam, Pu Kham Kam leh Pu Son Tual te a hihi.
27/4/1952 Nipi nitaak in 1952-53 kumsung a P.Y.O Committee dingin a nuai a bangin kiteel hi.
President: ………………… U Tuang Za Cin
Vice President: ………… U Kam Khua Lian
Secretary: ……………….. U Tun Pau
Assistant Secretary: … U Dam Khual
Treasurer: ………………… U Tun Khan Thang
Assistant treasurer: … U On Mun Mang
Member: …………………… U Lam Khua Lian,
U Ngen Za Thawng, Thawng Hau
Auditor: ……………………. Sia Suak Za Thang
Patrons: ………….……. Hausapa U Hang Za Nang, U Suak En, U Kai Khua Thang, U Ngin Khua Thang
Correspondent Secy.: U Kam Pum
Announcer: ………….… U Thawng Khan Thang
Standing Deliberative Committee: Lam Za Dal,
Lam En, Hum Do Thang
Public Habit Inspector: U Cin Do Lian, U Khual Cin Kang
Social Organisor: ……. U Thawng Hau, U Suak Pian Thang
Sport & games Orgr.: Lam Khua Lian, Kam Khua Cin
Education Organisor: S. Kam Za Thang, Pau Sian Thang
Sanitation Orgr.: ……. Suan Ko Thawng,
Lian Ngin, On Za Ngin
Activities Orgr.: ……… Suak Khat Thawng, Khup Hau te kiteel in တာဝန် ki piapah hi.
4/5/1952 nipi nitaak in Buzung mah ah kikhawm kik in seplehbawl masak ding teng kikupna pan-
I. Khuazang a tuineek tuinakpi te:
1. Vansuang Tuinaakpi
2. Innsak tungnung tuibul
3. Innsak nuainung tuibul
4. Taampi tuibul
5. Phaileng tuibul, tuibul nga (5) teng hahtuak, uumtuak te semphot ding
II. Kongzing lampi toilua teng pili (4’) zai in keekding
III. Kongzing teng apaisuk apaiphei siangthosak ding ci-in ki khensat hi. A hong khakdang aomkei naakleh 9/5/1952 ni panpahni, kici hi.
4/5/1952 nitaak thu kikup thu khensat a-om mahbang in 10/5/1952 nino ni-in Activities Organisor te’ makaihna tawh tuibul 5 teng ah khangnote kikhen in tuibul zangte hong paithei teng tawh tuibul hahsiang in ganpi lutloh na’ng in ki-uumkim hi. A zo masa te-in a zonunungte huh ding a kici hiven, kuamah kihuh kullo in kizo thei tek ahihman in ki nuam mahmahtek hi.
10/5/1952 nitaak pan kipan P.Y.O pawi ciang a lahding Buzung ah Drama leh Dialogue sinding ci-in Socialist Organisor U Thawng Hau leh U Suak Pian Thang te-in hong tangko mahbang in pawi kisinpah ngekngek hi.
16/5/1952 ni-in Pu Awn Khua Zam innzang khuanawl lamding leh Pu Khan Dai leh Pi Kham Cingh te inn kikal ah lamthak 2 a kihonzawh ciangin Pi Nuam Ko Cing innzang lamtung teng vattheu in suanglakteng zong vanpua a paitheih na’ng in kiziik pah hi.
17/5/1952 ni-in Taampi lui dung lampi a akitawn nateng ki hahsiang a, nitaaklam nai 2:30pm in ki zosiang hi. Tukum khalsung a sepding a aki ngelsateng kizo hi.
Tua ahihman in eimau hihzawhzah ciat sum kikum in khuasung nu leh pate kiangah zong အလှူခံ in a ki ngahzah peuhtawh 27/5/1952 Wednesday nitaak ciangin Buzungtual ah niangtui awm in Drama & Dialogue lak in khuazang in pawibawl in nuam kisa mahmah hi.
----------------
PHUNOM MUALSUANG | Page 101-105
