PHUNOM KHUAKEH
PHUNOM PAN KHUASATTHAK KHUATE
Phunom/Hiangzang khuapan ami a-inn aki khan theihloh hangin Phunom ah aki taitoh zawh 1903 kum ciangin Pu On Ngen, Pu Lam Sing, Pu Za Thang te-in Thangkai ngam Kuangphual ah khuasat dingin va kuankhia a, Khuathung-Khuangsuan mual panin Pu On Ngen in Phunom khua ah Nahnam po tahen, ci-in Zuu phihliang in hong nusia hi. Himahleh nikhatni ciangin Pu On Ngen leh Pu Lam Sing te-in Phunom mah hong zuankik a, Phunom khua mah ah ahun abei hi.
Ahi zongin Naulak te Pu Lam Sing, Pu Za Thang te makai-in pasal 13 in Phunom pan Suangdawh khua ah (1903 pan 1906), tua pan in Kuangphual khua ah (1906-1923), tua pan Akbutuun khua ah (1923-1978), Tua pan Tuivial khua ah (1978 pan tudong) na kikhintoto a hih manin Kuangphual/Tuivial khua pen Phunom khuasat/Phunom keh in ki ciamteh hi.
1909 kumin Pu Dong Kai leh Pu Thang Zel te-in Pimpih khuasat te sungah na kihel ahih manin Pimpih/Laihan khua pen Phunom khuasat/Phunom keh in ki ciamteh hi.
1918 kum ciangin Pu Zong Ngin, Pu On Thawng, Pu Phut Ngak te-in Laibung khua nasat uh ahih manin Laibung khua pen Phunom khuasat/Phunom Khuakeh in ki ciamteh hi. Dimpi, Phunom, Zung, Pimpih pasal in Laibung khua sat uh hi.
1020 kum ciangin Pu Thang Tun, Pu Lam Ngo te-in Bualpi khuasat te sungah na kihel ahih manin Bualpi/Tuisau khua pen Phunom khuasat/Phunom keh mah in ki ciamteh hi. Hih khua 4 tengpen tuni dongin kiplai hi.
PHUNOM MUALSUANG | Page 106
