PHUNOM KHUA THU

PHUNOM KHUA THU

Omna mun:

Latitude: 23°16'59"N leh Longitude: 93°43'59"E te kikal ah om hi. Ni suahna sak lam ah Thuamvum (8871°), nisuahna lam ah Kumlu (7231°) leh nitumna lamah Khumvum (7105°) mualkuam te sungah om hi. Tuipi pan (4921°) a sanna ah om hi.

Gamgi:

Saklam leh Dimpi leh Suangpi tawh ki gamgi a, ni suahna lam pan Thangnuai leh Thuklai tawh ki gamgi hi. Khanglam pan Thuklai leh Zung tawh kigamgi a, ni tumna lampan Zung leh Dimpi tawh ki gamgi hi.

Saklam pan Dimpi gam tawh kikal Muallo pan tuaksuk Suangpi gam Khullui (Phullui) dong, Phullui pan Sa-ek lui (Taklui) dungah Beliciang mual dong, nisuahna lam pan Thangnuai tawh kikal limkhawlmual (Khuangenmual) pan sak lam ah Dimzang mual ah paito, Phaipheek mual dong, Limkhawl mual pan paisuk luipi dong, Luipi pan khanglam ah ngatap lui dung zui in  Tuikawi dong,  khang lam pan Tuikawi (Tuanlui kipatna)  Ngatap lui leh Sialten lui kikal kituahna dong, Ngatap lui pen Phunom leh Thuklai gamgi hi.  Sialten Lui pen Phunom leh Zung gamgi hi. Nitumna lampan, Tuikawi pan sialten lui dung zui to in (Lengtui lui ah) Vaihmual dong, muallo pan paito Haisuang (Vaizung) mual dung zui in vaihmual dong. Muallo pan tuak suk Khuullui dong pen Phunom leh Dimpi gamgi ahi hi.

Lei Lup Zia:

Mual, kham leh ken vive hi a, lei zaangna omlo in. sim, zo leh taam ci-in khuahun leh leilup zia tawh kizui in, lei maitang kikhen hi.

Kum tawntunga aluang lui omlo hi. Pimpi lui, Vansuang lui, lengkai lui, nahtang lui, Hawl lui, Eng lui, Nahpia lui, leh Khuataak luite oma, Pimpi lui leh vansuang lui (innpam lui) te ah khal sungin tui tawmbek luanga, a dangte kang hi.

Kumciin mual dung tungah bitung mual om a, pi 5700 sang hi. Zo leh Taam, kumciin mual dung tawh kikhen hi.

Leisung Van piangte:

Suanglai leh innsuang tawhna khuk 5 om hi. Tuate in Khuangen, Khualai (Thaanken), Kumciin, Khuatak leh Piauzang suangkhuk te ahi hi. Piauzang suang pen tudongin tawhlohin om lai hi.

Suangpek piang ahi manin mi atamzaw in suanginn lam uh hi.

Khuahun:

February (Hulpi) kha bei lam pan huih nun kipanin, March leh April pawlin khuapi guah zuk kipan hi. Khuapi guah zuk ding ciang a nitumna lam pan meivom lom kai a nisuahna lam a hong kinawh hathat huihpi leh guahpi kinuai pen “Kum kidok” kici hi. Kum kidok hun ciangin mi khempeuh lungsim patau tek hi.  Khal ciang in 80°F dong a sat hun om a, Phalbi ciang in 20 °F dong bang vot thei hi. Phalbi ciang in vuk kia in tui khal hi. Taam lam mun khat khat te-ah ni khat bup sung vuk a tui lohna mun om hi. Phalbi zingsang in tuikuang sung vukdim ahih man in tua vukte nilkhia in mai kiphiat a, vot mahmah in ki pil siusiau hi.