KHAMTUNG TEDIM GAM,
PHUNOM KHUA AH
IH TEENTHEIHNA TANGTHU
Ka thudotpi Pu Kip Suan tawh kakihona-uh tawm honggen leng: (Pu Tun Pau)
Kaneulai in Hau Suak tawh, kapu Tun Khan Thang tawh ka thumun Pu Kip Suan kiang ah hawh in taangthu ka gensakzel uh hi. Amah in taangthu zaknophuai nono hong gengen a, ka ciahuh ciang in, “Hongpaizel un aw, konggending tangthu tampi omlai hi,” hong cizel hi.
Amah teekmahmah a, innsing, innkaa apaiding nangawn zong ciangkhut nih tawh pai khiamkhiam a, “khe-li-nei pu,” kaci-uh hi.
Amaupen ka inntungte uh hi-a, Hau Suak te-ii innnuaite a hihi. Hau Suak te’ kongpaam a, tuphung khawngpan a Pu Kip Suan a bithalaap nuai a tu ka-et uh ciangin, mithum a kilutuah a tubangin kamu uhhi. Akiang ah pai a, “deng a na tutpihte a kuakua aih” kacih uhleh lah, ama’n “kuamah hongpai omkei veh e” hongci a, ko lamdang kasa lel uh hi.
Tuazah a ateek hangin, abeng ngonglo, amit mangbeeklo hi. Aha tangkhatzong toklo a, a tuibuuk muammuamna, aha sansim hilhial lel a, a aw zong gingmahmah lel hi. A tuktum khutpicia pha viuhveuh laibek hi.
Amaupen Tomu beh hi-a, Tomu te tulpi leh Phunom khua tual phuisampipa ahihi. 1949 kumin si-a, khanglui ngeina aton, a-aih kicingtak tawh lamngial thaan ah kihui hi.
Atapa neubel Pu Lam Neng leh Pu Suan Khua Ngin in napu-uh kum 120 (za-leh-sawmnih) nungta a, azung puuk a si hi, hongci hi. Hileh kisawm samai ing. A sihkuan ciangin, ka cina cilo napi, ama tha tawh innkaa ah pusuak zo nawnlo a, Ni hongsuak a, apusuah nopciang in leh atumkik nopciang in a monu Ciin Cing in a tawipheizel mutheizel ing. Amah pen tulaitak a Tedim Myoma a teeng Sia Neng Do Thang te’ pusawn a hihi. Ama tapa pu Lam Ngo zong 1917 kum a Piantit paite khat hi. Tu laitak in a tusawnsawn te USA khawng ah pasal nei, zi nei zong honkhatmah a om hi.
PHUNOM MUALSUANG | Page 75
