NGEINA TUAMTUAMTE
Zuuluup, sagawh leh anlim huan:
Inn a kihawhte khual leh tual deidan lo-in, aneih bang zuu luupin an pia uh hi. Zuu khat an khat anek ding uh ciangin ama nekma ahih kei leh ama nek tangin mi khat leh nih “katel” ciin itna tawh pia thei hi. Nopna sung a kine sa leh sangoite khat leh khat itna kilahna in amau nek ding tangin khut tung tawi in kibaak thei uh hi.
Zin aneih uh ciangin aan lim a piak zawhna ding hanciam uh hi. Min kha min sagawh ci-in min neite-in amintap uh a sih ma-in, vok, bawng te gawh thei uh hi. A neizote-in a pi leh apu, anu leh apa, a sungnu leh a sungpa te sa gawh thei uh hi. Sum leh pai zon a pantan te, lai sin sangkah a hunte tungah a lungdam lahna in, sa gawh thei uh hi. An lim khat peuh a huan uh ciangin, a innveng tek kikholh uh hi. An thak ci-in tuuk tang tun cil in taksih, (tangman nganhuan) leh annawi (tangman sih) huan thupi sak uh hi.
Kihawh kilenna:
Zingsang thawh tung leh nitak an nek khit in paite vai thupite kikum khawm dingin kihawh uh hi. “Zawl hel” ci-in tangvalte a lawmte tawh nungakte inn ah hawh thei uh hi. Zawlhel hun pen nitak annekkhit leh lup hun kikal sungteng ahi hi. A thupi mahmah lo buang, “Numei dangvak thusia zong” ci-in numei vak ding kideih lo hi.
Nop leh Dah:
Nop bawl hunin innkim kisam a, zuu leh an neih bang tek tawi in khuazangin nekhawm dawnkhawm lungdam khawm uh hi. Dah hunin kidelh kitutpih loh phamawh in ngaihsun uh a, “Siatbat” ci-in zuu leh an neih bang tek tawi in sun, zan in ki thupih uh hi.
Damlo cina leh tuahsia a-om ciangin aktui ak tak, akhum a al neih bang tek tawi in ki veh kidelh uh hi.
Patau kangmei, gal leh sa tuak a om leh a ki sam bangin kipanpih in kihuh diamsiam uh hi. Nopna dahnate ah zuu leh sa a khum a al te tawh kidelh uh a, a hun zui-in kithukkik uh hi. A ki thukki zolo te leiba in kiciamteh lo hi.
Innlam, Inn phel:
Inn lam inn phelding a om leh khuasung upa khat kiko sakin khuazangin kihuh uh hi. Thatang bek tawh hi lo in bi phuk khat, gua pum khat, bantang khat an nek khat, zuu belkhat… etc, cih bang ciat tawi in kihuh uh hi.
Tha kihuh, tha kicial:
Lo thak zong, singphuk sing ek, losiam, cihbang a om leh veng leh paam tanau te-in ciallohin tha khat tha nih tek kihuh uh hi. “Thacial” ci-in inn-na lo-na khat peuhpeuh sem dingin kizawn a, zing leh nitak zuu leh anlim tawh ki vak uh hi.
“Tha nungvak” ding ci-in tuk tun ciang ahih kei leh an le tui neih kicin ciang a piak ding vak dingin tha cialin kihuh uh hi.
“Thabehpah” ci-in nitak-an ahih kei leh zing-an khat bek vakin tha kicial uh hi. Tha beh pah cih ciangin a tamzaw in nitak an kipia hi.
“Zingtah” ci-in nungak tangvalte a zingthawh phet uh in inn sing, sing eh…. etc, kipuakpih dingin kizawnin kihuh ngeingai thei uh hi.
Saman, sa kap: “Sawng” ci-in mihon kizawnin, gam sungah sahawl sabeng thei uh hi. Sawtna ah sa a kimat leh a lu leh a ngawng, anam leh a phei tum bul khat “Sakapsa’ ci-in kipia hi. Sa manpa in thau a kawm a hih leh thau sap ding in a liang khat kipia thuah hi.
Sakap sa leh thausap loteng samanpa a kipan, mikimin sehhawm dimdiam uh hi. Sa sungkua leh satak pawlkhat em in bak hawm uh a, nengeingai in nuam sa mahmah uh hi.
Sa minnei saza, sazuk, etc…, amat uh leh khua tun kuan ciangin, mual pan “hanla” samin, thau kap in “mualsuah” thei uh hi. Sawngin, khattangin a hih zong saman te-in innvengte leh tanaute sam uh a, sa a om bang huanin ki itna leh kilungdampihna tawh ne khawm ngeingai uh hi.
Lo lamah saman a om leh saman te-in a lo veng teng samin, sa pawlkhat huanin ne pah uh a, pawlkhat a sehin hawm uh hi.
Sawtna pan hitaleh, lolam pan hital eh sapuate inn lam kalah mitawh akituah uh leh, a kituakpihte sa bakno khat tek pia hamtang uh hi. Tua sa pen “Tal baksa” ci uh hi. Aliam, ana, asi, etc… khat hileng hong sawn masa ding, hong phong masa ding hiteh ci a, lungdam lahna sa ahi hi.
Gamsate a puak uh anek uh ciangin, “Kham ing” cinuamlo uh hi. Innsa, gamsa gawhna, nekna nopna dahna sungah sasin, salung, sakalte nupi pasal haamteng khuttung tawi in pia in kine sak hi. Khanghaamte itna leh zahtakna lim a hihi. Inn hitaleh gam hitaleh khanghaamte omna ah khangno te-in sasin salungte duh ta hang ci-in motneeklo uh hi.
