MISI LEH SIHHUINA
Misi a-om ciang a ni simna te, (MAAI)sihmaaini, (LAANGKHEN)laangkhetni, (HUI)sihhuini, THAANDAL ni te-a hihi. A ni masa ni pen maaini kici-a, tuani-in ahui ni ding kiciampah hi.
Sihhui ngeina nam nih in kikhen a, tuate-in Si tunghui leh Si pheihui a hihi. Si tunghui ah ngeina leh late akim in kizang a, ngeina cing tawh hui theihna dingin n inga ki thapai hi. Si pheihui nading in nikhat bek kisam a, tua nikhat sungin a ken ding sate ngo-in, zuu kiluup ding khempeuh ki luup siatpah hi.
Misi a om teh numeite kapin, zam leh thau tawh kiphawng hi. Mi khat peuh a sih ni pen “sih maaini” ci-in khuazangin ki ompih hi. Sih maaini in sihhui ding a ni kiciam hi. Ni kop cingin si kihui ngeilo hi. Sip nei leh si tung bui ci-in sihhui ngeina namnih kizang hi. Lupna tung pan akibuite “si phei hui” kici hi. Naupang si peuh mah a tam zaw ki phei hui hi. Ulian si a kiphei hui leh 1. Akilawh thei natna nei, nat gam 2. Zuu leh sa akicinga neilote…etc. a hi uh hi. Akilawh thei natna tawh a site amanlang thei penin kihui hi.
Misi pen a sih nitakin tanute-in, sibual ci-in sil uh hi. Tua khit ciangin nik leh puan hoih aneih sun tawh zem uh hi. Pumphel bawla zuu leh sa ngeina bang a kizang sihhuina pen “situnghui” kici hi. Misi lupna tung pan tuahkhia a, a tuna ding lim sing mam, guaphal leh phikphek (phek them) tawh ki bawl misi tuna pen “pumphelh” kici hi. Pumphelhtah(bawl) khit cianga sihmaisa kigo pan hi. Sagawh khit ciangin “citapa” in zuuphihin zuunek kipan pah hi. Misi pen pasal ahih a gal-ai nailo ahih leh, sihmai nitak “phamawh” bawlma in citapa in “Maltang” cii n aklui khat go in, gal-aihna lim bawl sak masa hi. Gal-ai lo mipeuhmah kiminlawh theilo hi. Numei gal-ai om ngeilo a ki min lawh ngeilo hi.
Sih maai nitak khuamial khit ciangin citapa in inn sungah zuu phihin, “phamawh” bawl ding hong kipan hi. Phamawh bawl ding ciangin, citapa in teipi khun kawmsa in khuang, dak, phit, leh sialki tumding hongpai mi 9 bang 10 bang tawh phialkhangah ki-uumin, “Khoi khoi khoi….; pului lui lui… lui ci-in thuvei awng ngeingai uh hi. Tua khit phet leh khuang tumin, laampi, phit leh dakte khuangaih huai, lunglenhuai, mulkim huai takin tum litlit uh hi. Tua laitak mahin citap in misi “nin lawhna” – “(misi min” takte, (....) takte, si a tanga (….) takte: galmang that a thanga, samang kappa thanga (….) takte (beh pupi min) ii tu (….) ii tu, Hiangzang mi, Hiangzang mi: ci-in awng a, min lawh in thau lawn hi.
Phamawh bawl man ciangin Munzang la tawh panin sila atuamtuamte a banbanin kisa hi. Sih maaini a zing nitak pan khual tun nitak kikal asimuna lasakna pen “sigih” kici hi. Sigal ding khualte tunni pen Khual tunni a hih kei leh “innka balw ni” kici hi. Khual tunni a cingciang “laangkhetni” kici hi. Tuan i in “lamtak (kuasah” ding teng kigo hi. Inntekte gawh pen “langpalpi” kici a gawh loh a phamwh a hi hi. Laangkhet nitak in sihmainitak amah bangin “phamawh” kibawl masa hi. Tua khit ciangin, “munzangla” tawh panin sihlate abanbanin sa a, lapi te tawh zomin kizan hak hi. Khuavak cianginn, “Pesikla” sa in innka ah laam gui in phei laam uh hi.
Pesik man ciangin zingan kine hi. Annek khit ciangin ci tapa makaihna tawh phamawh bawl- laampi dingin inntual ah sial kitumpa masa, abanah khuang tumpa, teipi tawi in citapa, azom ah phit leh daak tum ding papi guk in zom uh hi. Laampi kipat ding ciangin phamawh bawl ngeina bangin thumvei a ot khit ciang un sialki, khuang, phit, dakte tum leh teilok kawm sa in Paulo phun lo in, inntual ah kot sagih laam kipan uh hi. Kot thum a laam khit uh ciangin citapa in bithalaap nuai pan inn sunglam nga in zuu phih phei a, “(misi min)” lo-in, hong pusuak in na lawm na gual zakta ken, na thah namat, nagawh naluup tawh hong pusuak in, mim nathawh tang nathawh tawh hong pusuak in, na tuangdung na dolcial tungah hong laam in, ci-in misi hongsam hi. Tua khit phet leh tanu te-in misi hong puasuah uh a bithalaap hong tun ciangin citapa in misi min lawhin zawng hi. Misi kipusuah min lawh man phet in thau nasia takin kilawn hi.
Misi kipusuahma (huiding nima) in, “Hiangzang mi, Hiangzang ami…” ci-in kiminlawh a misi kipusuah ciangin, “Vanlai a mi, Van lai a mi…” ci-in min lawhna kilaih hi. Misi a kici huini a kipan, a kha van ah om ta ding hi, cih upna hang ahi hi. A tongte laangkhet nitakin kipusuah a, “laampi” kot kua kilaampih hi. Laampi khit ciangin misi innka laizangah nga-in numei tengin uap uh a, pasal tengin “Munzangla” panpah in, sih la leh lapite sa in laam kipan uh hi. Sun thapai in si laam si minlawh, zuune lasa in numei pasal laamlaam uh hi. Nitak niniam ciangin “zinthak la” sa-in tua khit ciang in citapa ‘makaihna tawh si pusuah lai amah bangin misi samin khuangaih huai, lunglenhuai mulkimhuai takin inn tual ah laampi kipan uh hi. Laampi kot cinna ciangin, “zinkha” ci-in misi kong dong laampih uh hi. Tua laitaikin “A vavomdimdim, khankha vom dimdim… cih la phamawh bawl laampi tengin amau zakkhopin sa litlit uh hi.
Numei si a hihleh tua la tawh kong kalpih in kihui suak hi. Pasal si a hihleh “sanolh” ci-in abullamin sanolhla, a dawn lamin “Hoi.. hoi.. hoi.. lui, luiza, vaw” ci-in sanolh la a bei dongin si zawngkawm lasa kawmin inn sung lam sangkil dong, innka lam inn ka dawn dong kinolh pualpual in sanolh la, “Zaw e, zaw ee, …” tawh kong kalin si kihui suak hi. Sihhui ding ciangin tangval pawlkhat sahnu sat ding ci-in thaan lamah kipaisak masa hi. Khuado ma asite, khuamual ah banpihin, “Bangta kawnla” sa in ki laampih thei hi. Thaan ah tanupipa in misi’ ziat leh vei khut sungah, alam takpi ii sin humsaka, - Naziat a natawi napu (...) napi (...) tutin, navei a na tawi na kisikpih masa pen pia in ci-in zuutaaktui tulhin a vaikhak hi.
Tua khit ciangin ‘Mimci, tangci hong khiatin; sazuk sakhi vompi ngaltang galmang samang hong hawl in” ci-in phuisamin zuu aphih khit ciangin, thaankong khakin si hui aki man ahi hi. Tanupipa mahin thaanpan ciahding ciang leh misite’ kong tunkik ciangin, khua sunga beh omteng min lo-in “Kha hong ciah in, u si zui mawh nau si zui mawh” ci hi. “Inn-lum lo-lum hong zuanin” ci-in “Kha sapna” nei hi.
“Thaantun zuu” ci-in sihui thaanpai te hongciah ma-in citapa in a kikoih tuam zuubel pan zuphih in, misite innkuan’ khasapna nei hi. Thaan paite-in “vantung ten sai ekkha ne, keipawh hong ciahkik ing e, keukeu ava: kaukau ava” cih lasa kawmkawmin hong ciah uh hi. Inn hong tun ciangin thaan tun zuu leh zuu dangte teep in kong lam nga in phih uh a, “Kha hong ciah in, keima’ kha, kanu; kha, kapa’ kha... hong ciah in cin amau; kha a nu; apa; kha leh a u naute’ kha sapna nei uh hi. Tua bangin lasa in akha uh sam kei le uh, misi nungzui in amau zong si thei cih upna nei hi. Sihhui khitteh inntek ah khuang leh zam kiging sak nuam nawn lo hi.
Sihhui nitak in abeh leh a sanggam bulte, asungh leh apu, atu leh amakte a-inn tek ah amau kinaipih tekin ciapih uh a, siabat in ki tutpih tek uh hi. Sihhui ni a zingciang “Thaandalni” kici hi. Tuani zingin khual pan singal teng ciah uh hi. Khua sung pan u leh nau tengin ki tutpih lai a, salu teng kheuh in sa namteng tawh kihuan hi. Pasal si ahih leh maini in agal-aih leh sa-aih te tawh kizui in dial vom dialkang, dial san, etc… a tuamtaum in kikhai a, sa-aih lian bel ii dial kikhim sak hi. Pasalte anuntak lai uh’n amau gal-aih sa-aih lianbel ii dial khim sak hi. Pasalte anuntaklai uh’n amau gal-aih sa-aih nam tawh kizui-in dial khim uh ahih manin amau ih muh phet in “Hua pa sai-ai hi ei; sial-ai hi ei…” ci-in kithei pah hi.
Sai-ai te dial kang, sahang–aite dialsan, gal, sial leh sa dangdang aite dial vom, vaphual-aite dialvom dawn a kang kipeh… etc kikhim sak, kikhai hi. Thaandal ni salutang kheuh khit ciangin tanute-in salu hawm teng leh dial kikhai teng thaanmualah, mualsuang (khan) nei ahih leh mualsuang phuhna ah pua in suang uh ih. Misi pen ii akhan teptehna in mualsuang, - singgelhte zong kibawl thei hi. Pasal singgelh ahih leh aluzangah a zum khat, numei singgelh ahih leh aluzangah a zum nih kibawl hi. Singgelh tungah galmat asamatte ii lim kigelh sak hi.
Misite inn leh sih sung akizang zam, khuang, sialki, daak, thau, lum leh tei khempeuh thaandal ni in citapa in “tongnah leh sianialteh” zapin tui buakna tawh “siansuahna” nei hi. Sih maaini zupatma in kong pualam kongpal teengah zuu beeltungno khat tui leihsa, peng phuhsa in kikoih-a, “tang nanna” kici hi. Singal a hongpai misisate’ khate in tangpi zuu anekpihloh na dinga kilup ahi hi. Thaandal ni in tua zuubeel lakik in kikhuah hi. Thaandalni zingciang, “vamluah ni” kici hi. Tuani in tanau bul teng leh inn veng teng in tutpih lai hi. Sihbui khit kha khat sung bang, tanau sung nungak tangvalte-in giakpih thei uh hi.
Sihsunga kisa late: 1. Munzangla 2. Tuainau la, 3. Haitupi la 4. Galla 5. Gal phawn la 6. Vontawi la 7. Simlei la 8. Sanggah la 9. Khangthak la 10. Tuimu la 11. La leh lawi 12. Pasik la 13. Zinkhak la 14. Sanolhla 15. Bangtakawnla 16. Nauhui la 17. Lapite (pu leh pi, nu leh pate’ neih late). Misi ii khanghamna khangmoina, gal-aih sa-aih tawh kizui in la kisa hi. Gentehna in: khangno si ahih leh Khangtak la kisa ngeilo hi.
Samal hawmna: Tanupi te thum teng, a phei meibaang khat leh a liang nih kipia hi. Tanu lianbel – a phei meibaang, azom bel – a liang ziat, aneu bel – a liang vei, a hi hi. Tanu sabawl nihte abawl khattuak kipia hi. Cita tengel a iksa leh a naak khattuak pia-a, cita nu pen a naak tawnkhat kipia hi. Tua loteng samal hawm ngeina bang a hi hi.
PHUNOM MUALSUANG | Page 55-58
