LUIKAA KHUA THU
A khua laizang ah tual bawlin a tual ah Laam inn (Biakinn) lampah uh hi. Tua Laam inn sungah biakna ngeina a kizang khuang, zam, daak te pan a kipan sattheih, muttheih, tumtheih a tuamtuamte khempeuh koihin tuuk an laakkhit kha 3 sungteng “Tualzuan” ci-in nitaak sim in khangnote kimawl in pawi atuamtuam abawl uh hi. Kimawlna leh pawi bek hilo in lai sinna zong anei uh hi.
Lopawi khit ciangin cidam, ludam, khansauna leh neih le lam, miimcii, tangcii ngetna in tualthoihna khua biakna a bawl leuleu uh hi. Khua biakna tual athoih uh ciangin a khuabup in mihing thamlo nganhing nangawn kongpua kansaklo in nikhat tangciim zeh a tang uhhi. Tua tualdawi tanni in a tualhuam laam inn ah kuamah a pailoh banah mikhual peuhmah a khuasung ah a lutloh nading in lampi akhak uh hi. Apai alut a omteitei leh zehphiit (dawiphiit) ci-in tual thoihna beiteng lulsak (tulai pau-in liausak) in a tual a thoihkik ngiat uh hi.
