LAI BEI NA
Tanglai ihpu ihpa te-in lai a na neingei mah na hihtuak uh hi. Kawlpan Khamtung ah a taitoh uh ciangin a lai-uh nguadaa tung ah ngelhin na pua-uh a, Luikaa khua a laam inn sung ah akoih uh hi. Nikhatni ciang in ngunngal pan in ngam hongkang a, tua ngamkang sungpan in Valuk khat amei kang(kuang)kawmsa in lengsuk a, tual laam inn tung a paangpi tung atu hi. Tua valuk mei kuangin tuallaam inn lawh a, a sunga van om khempeuh a kangtum khin hi. Amaute-in tua laam inn kaangvaam tang-a a omni keekkeek in kawlpi panin lai dongding pasal khat hong tungto hi. Athu teng angen ciangin tua lai dongdingpa in “Kuamah in tua meivaam sung siikkei hen” ci-in tua lai kigelhna nguadaa meivaam teng khawm in tua laiteng a vekpi in a teikhin thei hi. Amah pen a lai teikhiat tengtawh a ciahkik pah hi.
Banghang in Kawl pan in laitei ding hongpai hiam cihleh amau neihsa lai pen savun tungah agelh hi a, tua savun ui-in neeksak ahih man in lai nei nawnkei ung a ci hi, ci hi.
Luikaa khua mite-in Tuallaam inn a kaak manin a maikum ciangin nguahtui hangh (tawmngawp) in zawngkhin uh ahih man in mikhat ii khatvei anneek ding khutpi cia, khutpi tan khattawh tehin an ahuan ta-uh hi. Tuabang in a zawn manuh Tuallaam inn lah puah zolo in laizong a sinman nawnkei uh hi.
Khangham laithei te a beiciang in Kawl pan a laitei a hongpaipa Luikaa khua ah lai hilhding in a vaitha kik uh hi. Tuapa zong paipahtei napi Luikaa khuate ii lo atun ciangin azu ava te siahna thaangte amuh ciangin, “sasiahna thaangte zong kipelh hetlo a theilai ahih ciangin laizong mangngilh khin ung a cih hangin hong khemna hi-incin, hong matnopna hivak” ci-in kilehkik in a pai nawnkei hi. Tua pan in lai thei omnawnlo uh ahihman in lai a beita hi.
PHUNOM MUALSUANG | Page 81
