KHUANGEN KHUA SATNA THU

Tunlam pen Engzang pan Khaukul ngam zuan a, tuapan Engzang te-in Pusa thoih a, a paileh Namkhat phan a, a sangngamte-in zuu ne-in a cihleh ka nam zo dektak ing in hong zovetning ei, a ci-a, tuapan a-u te nam hongpia in Khaukul khua ah ciahkik a, tuapan Engzang zuan nawnlo hi. Tuapan Thangnuai khua kipan hi. Tun Lam ta Kim Thang hi-a, Thangnuai in na khempeuh ah Kim Thang zanghi.

Engzang ah khang nga dong kiteng a, Engzang pan Hiangzang khua asatpen Tun Tawng, Phut Lam leh Mang Hill a hihi. Hiangzang khua ah khang nga kiteng a Mia-uk suan ciangin tulaitak a a kitenna Phunom khua ah a ki taito in Buansing leh Mang Hill in Phunom khua ah hong zuito nawnlo hi.

Namzo Tun Lam in a-u Tun Tawng te Mang Hill te kiangah ngam ngena, luipi ciang a zattheih dingin pia hi. Phunglai pen suante te hi-a, Phunglai in Kalzang a kisiat ciangin angam a tenna ding zongin Tiddim lam ah vakthap hi. Hong ciahciangin Khuangen tawnsuk in sa siaha a-awk hi. Tuapan hisung kuangam hiam, ci-a adot ciangin Phunom ngamhi kici hi. Phunom ngam a atheih ciangin akam in hongngen a Phunom pasal in pialo hi. A piakloh ciangin sialtak tongsuh khat leh keeltal zangkhen khat tawh hongkuan in hongngen hi.

Tuate tawh hongkuan ciangin ngalnei ihomleh (..) in kimang niingin ngam khenkei ni-in zangkhawm ni, ci-in, tenlahna naneih uhleh ko ngammah hikik ding hi, ci-in thukim in ki tengsak hi. A khuamin dingin Khuangen kiphuak hi. Inn sawmthum aphak ciangin ngam hong khennuam hi. Ngam hongkhen ciangin Phunom pasal donglo-in nahzang khua-ah, ngalluah- suangkeel ah, pimpih lui sunphei-in, tuapan patio suangpi ah laingial ah tangvautam dong ah hong khennuam hi.

Tua sungpan Phunom pasal tawh ki kamtam a, tuaciangin tu laitak a suangpi la paiphei, ngalzang ah, daam ah paiphei-in, tumthaang lu-ah, khuaikai ah tuabangin hong khennuam hi. Tuateng hongkhawl ciangin Khuangen tetawh kisia in tuazawh ciangin Pawingal in hongsim ciangin honglal hi. A tun nawnloh ciang a kipan Phunom in a ngamteng zangkik hi.

Mangkangte hongkhan ciangin Phung Lai in kong ngamngetna sial leh keel hong lohun, ci-a a ngetleh Phunom te-in pianuam nawnlo hi. Phun Lai ngamteng Son Khai in hong kan-a, Phung Lai in ama ngamding a abawlsa teng Thangnuai leh Phunom in dangka Ks 1500 in kitan hi. Phunom in Ks 1000-man tan a, Thangnuai in Ks 500-man tan hi.

----------------

 PHUNOM MUALSUANG | Page 108