KHAWLAI TE PHUNOM AH TEENGTO
Mikang kumpi in 1889 kum beima in hongzo in kilemna bawlzo hinapi, Kala galkapte-in numeite a buan sak zanzan theihna leh kumpi huangsung a a lutkhate thudotna thusitna omphot mello in a kaplup pahpah na hangin pute pate lungkimlo in 1892 kum October ni 9 ni-in Fortwhite a-om honguk Myo-okpa Pumva khua ah nazol in Suangbum pan nasuam hi. Hih Myo-okpa’ suamte a matnopna hangin kumpi in gamsung khua neuneute a laisaanna munmun ah hong gawmtuah a Khawlaite zong Hiangzang khua ah kigawm dingin thu hongpia a, 1894 kum November 28 ni-in Khawlai khua nusia in Hiangzang khuatung Phunom ah Pu
On Kham, Pu On Lam, Pu Thang Lam, Pu Kip Suan, Tawng Lam, Pu Za Thang, Pu Khoi Thang, Pu Hong Cin te na kikhiinto uh a, amun agam nawngkai na omlo hi.
Pu Kip Suan leh Pu On Ngo te’ honggenna ah Khawlai pan a ki taitoh laitak in Hiangzang khuathak Phunom a a tualveng ah inn 7 na teengto pan bek a, Khawlai pan a ki khiinto inn 8 tawh inn 15 kipha hi, ci hi. Tua laitak in Pu Suum Hang in Hausa leh tualteek sem a, Thual Kam in tual phuisam sem a, On Ngo in pazang sem hi. Khua upa in Lam Siing leh Lam Ngin omhi ci hi. 1903 kum ciangin On Ngen, Lam Siing te pazang sep pan Kip Ngin leh On Suang in laih hi. 1927 kum in Kip Ngin si a, a khua upa seppen Kip Ngin leh On Suang in laih hi. 1927 kum in Kip Ngin si a, a khua upa seppenKhan Dai tungah kibaangin 1948 kumdong sem hi. 1948 kum panin khua hausa upate Village Council kici hi. 1948 kum kipat panin Pu Thual Kam in 1956 kumpan’ ama sihdong khua upa Village Council a sem hi. Tuazawh ah mipi teelte-in hausa, upa sem hi.
Pute pate-in Mikangte naakpitak in nanang phot a hihhang in 1889 kum sungin zo-in honguk ciangin Thauteng hongkhawm hi. Pu Lam Ngin in a thau a-ap ding ciangin (a) Leido zatam alsi tawh kim, luang 9 muan lei ka suahna, (b) Luang 9 muanlei suaksak ing e, ka tawi kawlciang taanta lenglah, lung kasiikna omlo e, ci-in a thau a ap hi. Ihpu ihpa te gam leh lei a itna in Mikang kumpi a dotakpi a hihna Pu Lam Ngin in La in honglak hi.
