IH TEENCIILNA
PU MASATE’ THEIHTAWP
Pu Kip Suan in, ih pianna, ih teenciilna pen Sengam(China) nitumna saklam, Mongolia gam, Khulpi pan a piang hihang, ci-in ka pute, ka piite-in honggen theizel hi. Tuahun in inn leh lo kineilo a, gamsa bang in leihawngsung, suanghengsung peuh ah kiteeng hi. Tualai a leiheeng, suangheeng te pen, eikhang a leiheeng, suangheeng te bangbek hilo a, innkuan sawmsawm ii takna ding a, leiheeng, suangheeng a zaipipi om-a, tuate sung a aki teeng hi. Tua leiheeng, suangheeng lianpipi te sung ah tui zong luanglel hi, cihi.
Tuate’ sung ah kipui, kiteeng in, nausuak in, pawibawl in, ahang, atong, zunung, gal-ai, sa-ai mah om in, si mah kihui hi, ci hi.
Lo kitho lo in, gamsa bangin, singgah, khaugui gah, leh apinei neektheih atuamtuam te zongin nisim in tuate tawh ka kivak uh hi, ci hi. Sa duhleng lah azu, ava akipan gamsa te innsa bangin omlel a, nisim in zu leh sa tatsatlo in ki nene hi, ci-in kapiite, kapute un hong gengen hi.
Mongolia ah kumbangzah kiteeng cih kitheilo hi. Mi apawlcinzawkdeuh ciang in gal leh sa uukte makaihna tawh mi pawlkhat thang nitumna lam Tibet mualzang ah na laluh a, Shanxi mualzang ah khua nasat uh hi.
Sengam (China) ah kumpi masa Xia hi, kici hi. Tua Xia kumpipa pen BC 1766 kum ciang in Shang Dynasty (Shang မင်းဆက်)in suankhia a, Anyang khua ah Shang မင်းဆက် kum 500(za-nga) mang hi, kici hi.
Shang မင်းဆက် pen BC 1122 kum ciang in Zhou (Zo) မင်းဆက် in sim in, notmang a, BC 256 kum dong kum 800(zangiat) sung Loyang khua ah mang hi, kici hi.
Zhou (Zo) kumpi hunsung in Confucious a kici mipil khat hongkhan a, tuapa in, innkuan nuntaakna, nu leh pa, pi leh pu leh tulpi te zahtak na’ng leh beh leh phung, sung leh pu kizopzia leh zuuhawm, sazeek zia cihte hong bawlpha a, tudong sente-in zanglai-uh hi, kici hi. “Ei Zomi te-inzong ih zuuneek, ih sazeek zia te pen Sengam pan a ihken hoh hi tasop ven,” Pu Kip Suan in hongci hi.
Sihhui, nopbawl, ngeinate leh luah leh ngakte pan a kipan, biakna, ngeina zatzia te tampi mah hong phuankhia hi.
Sengam ah biakna tampi om a, singpi dawi, suangtum dawi, gunpi dawi, ciaupi dawi, mualsang dawi, mualniam dawi, innsung dawi, sumtawng dawi, huanthang dawi, dongin tangpi mah neihi, kici hi.
Zhou (Zo) kumpi in a minam zui-in a uk sung Sen gambup khen 7(sagih) suahin uk a, innteeng sila tampi khawi-in, a thahnopleh thatin a zuaknopleh zuaklel hi. Siahtung, siahphei kai in uk hi. Tua khen 7 (sagih) te Han, Chou, Wei, Chow, Yeu, Chi leh Chin ahi hi. (Han, Zhao, Dai, Yan, Wei, Chu, Qi)
Zhou (Zo) kumpi in hih gamkhen (7) District te huamin tai 1500 asau galdalna kulhpi (Great Wall) abawl kimutheilai hi.
Note: A tung a min 7 tengpen ih pu masa te ciaptehna hi a, (Yan (燕), Zhao (趙), Han (韩), Wei (魏), Qi (齐), Chu (楚), Qin (秦)) a hi uh hi.
Zhou (Zo) in siahkhua tulval nei a, siah tamlua ahihman in, a siahkhua te lungkimlo in a omlaitak BC 256 kum in, Chin tapa Zen Chang in simin zothalgawp a, a man’ ukpi sempah hi. A ukna minpen apa’ min puasak in, “Chin Shi Huang Ti” ci hi. A masapen a lian Chin kumpi, cihna hi, ci hi. Chin kumpi pen Lou Yang khua ah mang hi.
BC 206 kum ciangin Han mite-in sim leuleu a, Chin ukpigam/Lou Yang khua beita hi. Hih hunciang in Chin mite leh ZingPhaw makai in Kawlgam sung ah taisuk a, Tuikangpi dongin na kithuahsuk uh hi. Tuikanngpi dungah Chin mite nuamsa in aten ciangin tua tuikang gunpi pen Chindwin (ချင်းတွင်းမြစ်) naci hi. Tualeh a sawtlo in Shan Burma te-in not leuleu a, ZingPhaw leh apawlte Izuadi gun zui-in taitokik uh-a, Izuadi gunnak teng ah khuasat in teenguh a, tu-in amau te Kachin te kici hi.
Chin mi pawlkhat te-in Izuadi gun zui-in taisuk suk a, Zanglung tuipi ngei khawng ah teengin, amaute အောက်ချင်း kici hi.
Chin mi pawlkhat in Tuikang gunpi zui-in taitoto a, Tuikang gunpi leh Meitei gunpi kituahna pan gun kanin tualai ah tawlkhat nateng uh a, tuamun pen Khawlkhem ci-in tu-in Kalewa kici hi. Kalewa ah tawlkhat atenkhit ciang in Shan Burma te-in sim leuleu a, hong kikhinto leuleu in kawlzang munkhat ah khua hongsat leuleu uh a tua kawlzang pen tu-in Kawlpi / Kalemyo kici hi. Kalemyo ah khua phutin khua uum na’ng taih/leiseek ciangding a akipat a sawtlo-in Shan Burma te mahin simto leuleu a, sak leh thang ah ki thehthaang leuleu hi.
Ei’ pute unau 3 in a paikhiat ding ciangin a ubel in, “Tu-in galtai ding ih hihciang in, ih tuna melmel dingzong ki theilo a, ki mukik baihding maw, ki mukik hakding cih ki theilo a hih ciangin, ih kimuh kik ciang a ih ki telkhialh loh nading in ubel in ih sam ihdeek ah tumin, naulai in luzang ah tumin, naubel in taltang tung ah tumni, tuabang a ihki ciaptehna pen ih tate ih tute tungtek ah zong vaitha tekni,” ci-in a ki vaithak khit ciangin a naute ngel in Meitei gun zui-in taitopah a, amau koipan kikhen kik cih ki theilo hi. A hihhang in Falam mi leh Hakha mite a samtum dan uh na kibanglo pah ngeii hi.
A ubel Pu Song Thu leh a sangngamte pasa 6 te azi ata tawh Tuingo dungzui in taitopah a Tawivum panin khua a en masa uh hi. Tua mualvum sang’ a saangzawlai Thuamvum a muhuh ciangin tua mualvum a zuan leuleu uh a, tua Thuamvum a tunuh ciangin khua hong etkik leh a taikhiatna Kawlpi leh a naute’ zuihtoh Meitei gun a muhuh ciangin lungdam in gam thaina Muibiak, Suangthuu 3 honh phutpah uh hi.
Tuamun pan in Kawl pan a Meitei gundung a zuito a sangngamte tawh a kimuh theihna a omkha hiam ci-in Meitei gun neekding in nitumna lam ah mualdung zui-in hong tuaksuk pahuh a, Zawm mualvum a tunuh ciangin veilam tawnding maw, taklam tawn zawding, ci-in khua etna khat hong neikik uh hi. Tua mun pan in nisuahna lam mualzui mah in hong tuaksuk uh a, tuhun a Saizang te’ teenna mualdung zuisuk in Ngatan lui leh Meitei ngun kituahna Luikaa zangtam a tunuh ciangin khuasat ding hong ngeluh hi.
Tuamun a tunzawh hun asawtlo in Kawl pan a Meitei gun zuito a sangngamte 2 hongtung uh hi. Tuate-in “na meikhuutna uh ka muhuh cianga kong paipai uhleh hisung hong tungthei hi-ung” ci-in lungdam in a ki kahliang uh hi. Amau Locom/Tashon ah khua kongsat uh a, ka gam veelna uh ah, hihlam ah gam hoihthei mahmah in notawh ih kihawh theihna ding in Bualtung ah hong kikhiinbaih thei vak ung, a ci hi – ci hi. Ei’ pute zong lungdam in ngunpi kaa ah khua phut taktakding a ngelpah hi.
PHUNOM MUALSUANG | Page 76-79
