HIANGZANG KHUA SATNA
Beellei khua pan Pu Mang Kim sihzawh ciangin a tate Tun Tawng, Tun Lam te-in Kalzang a teeng, Suante te Mang Hil, Buansing te Phut Lam leh Thangpang te Suanh Tawng tetawh Engzang khua satkik ding in hongkuan uh a, Pu Tun Tawng, Pu Tun Lam te-in pute pate-in eimau meisan tawi nasa ah lutkik nuamlo ci hi, ci-in Engzang khuamun sungah teng lo-in Engzang khua ii a nitumna lam, Hiangzang a cihna ah Biakpiakna suangthu phut in, pasal lumtawi inn 80 hong phasak in, ci-in phuisam in tui nakhuat uh hi. Hih hiangzang khuasat pen khangnguisut te’ tuatna tawh AD 1650 khawng hiding hi, ki ci hi.
Hiangzang khuasat zawh khang 4 na Pu Kang Thang khan laitak in Dimpi khua pan, Kongpi Naulak a kici Pu Kim Thuk te innkuan leh Pu Eng Lam te innkuan hongtung hi. Tua nungciang in Dimpi pan Sasih ah tai-a, Sasih pan Kalzang beelding a hongtai Khup Vungh thah Pu Luh Khup pan khang 4 na Pu Suan Zong te innkuan, abehpa Kim Thuk te’ innah hongbaang hi. Pu Kim Thuk in atai na thu teng adotkhit ciangin “Suan Zong aw, Kalzang khuapi beelnuam na hihleh Dong Phut genbangleh Kalzang zong ki thutuak nawnlo hi, hih lai-ah ih unau khawngin teengkhawmnii,” ci-in athohleh Pu Suan Zong in zong mangpah in Hiangzang ah hong teengpah uh hi. (by: Pu Kham Kam, Pu Kham Ko Suan, Pu Dong Ko Hau).
Hiangzang khua inn 58 hongpha a aki lungdam mahmah laitak in AD 1880 kumsung in puulpi zavat hongtung a, luang 80 val bei hi. Innbup a beizong om hi. Dawi kitain khua nusia in gamsung beekin kitaikheek siat hi, ki ci hi.
HIANGZANG KHUA KI NUSIA
1889 kumsung mah in mikang galkapte-in zo-in hong uk a, mualcin guamcin pan in pengkul muut in, kido nawnloding hihang, na bukna naomna tekuh pan in nakhua uh hong zuan ta-un, ci-in hong otsansan hi. Tuaciangin gamsung beelteng in khua zuankiktek ahih hangin pute pate-in “eima meisan tawi nasa ah lutkik nuamlo, cihi,” ci-in a innmun a khuamun sung ah inn lamkik nuamlo in a teenthak nading uh a zonna in, Aisaan uh a, Siampipa in Hiangzang khuatung teng a tending in Ai ngaihang, Phun om hi, ci a hihman in inn lamzo masasa in tu-a ih teenna Hiangzang khuatung teng ah teengto in Phunom khua na cipah hi. (Pu Kham Ko Suan, Pu Ngin Ko Thang, Pu Tun Sing)
Ka tangvakno, 1950 kum pawlin papite kiangah, “banghang a ki minlawh cianga, “Phunom a mi” ki cilo a, “Hiangzang a mi” kici hiam? Ka cihleh papi te-in Phunom cihpen mimin lah hilo gammin lah hilo, leitangmin a hikeek zongin, khuasaatna, tui khuatna, leitang/gammin bektawh ki minlawh thei ih hihi.” Hong ci hi. (Pu Tun Pau)
1972 kumthakni in Pu Ngin Ko Thang kiangah hawh in, “banghang a Hiangzang khuamun noptuak mahmah napi, hih Phunom a kiteengto se a hiding hiam,” ci-in kadotleh Pu Ngin Ko Thang in, tu-a nongdot mahbang a keizong Pu Suum Hnag ngeiah na dongngei luilam ing. Pu Suum Hang in “Hiangzang pen a munnuam in tuizong kicing a, ganno zong hoihthei pungthei mahmah a, ankhing zong kikham lel mah hiven, muhtheih muhmawh gal in hongnawk chithe a, khutkhial baankhial zong kitam hi. Tunung mikang gal hongtun mahiat inzong Puulpi zavat hongtung in luang 80 val si-a, ki thanem lua a hihman hi, ki citek hi,” hong ci hi, ci-in honggen hi. (Pu Tun Pau)
PHUNOM MUALSUANG | Page 86-87
