GAMGI LUI TE
(Previous borders)
Mikang kumpi in gam hong khensakma a Phunom/Hiangzang te’ gampen Khuaimu mual pan a kipan nisuahna lam ah Tuumthaanglui dong, Khawlai tetawh kigi zawng hi. Nisuahna lampan Tuumthaanglui zuito in Saem ciang sunto a, Khaukuul/Thangnuai tetawh kigi zawng hi. Nitumna lampan in Khuaimu mualdung zuito in Uaizung hum sunto a, Zungte tawh kigi zawng hi. Uaizung hum pan Vaihmual kaanin Taamlam ah tuaksuk a, Khullui sunsuk in Dimpi tetawh kigi zawng hi. Taamgam a tawlam pan Khullui zuito in Taaklui tawh a kituakna dong Suangpi tetawh kigi zawng hi. Taamgam nitumna lam pan Taaklui zuito in Thuamhum sunto a, Suangpite mahtawh kigi zawng hi.
Kumpi gamkhenma a Khawlai te gampen nisuahna lam pan Mualpi (Mualthung)(tulaitak sihzang gam) dungzui in Tuanlui sunsuk a, Thuklai tawh kigi zawng hi. Nitumna lampan Khangmual zuito in Zungte khuataw sunto a, Taakmual tetawh kigi zawng hi. Zungte khuataw pan nisuahna lam paiphei a, Khuaimu mualdong Zungte tawh kigi zawng hi. Khuaimu mualpan ni suahna lam paiphei suak in Piimpilui dong Hiangzang tetawh kigi zawng hi. Piimpilui pan ni suahna lam ah paipheisuak Hawlpi mual paisuk dong Khuangen tetawh kigi zawng hi. Hawlpi mual paisuk pan ni suahna lam mahah paipheiphei a, Keenkang taw dong Khaukuul/Thangnuai tetawh kigi zang hi. Keenkang taw pan Minpi lu ah mualthung to a, sihzang/Lophei tetawh kigi zawng hi.
PHUNOM MUALSUANG | Page 93
