GALPI NIHNA SUNG GIM THUAKNA TE
AD 1939 September ni 1 ni ciangin Leitung galpi 2 na Japan gampan in hong kipan hi. Japan te hong tungleh mi khempeuh hong vatmai ding hi, ci-in hong ki lauthawn gawp a, mi khempeuh kilau mahmah in, ihinn ihkhua nusia in gamsung ah, keenkawm, guamkawm tengah, ihneih ihlam khempeuhtawh tai-in kibutek hi. Japan te Kawlgam honglut in hongnai toh semsem takciangin, ihgam ihlei huu-a Japan gal nangding in, tua laitak a Tedim vuandok a-om Carey in 25/4/1942 ni ciangin Chin Levy hongphuan a, Eima thau eima guaian kengin kikuan ngeingai hi. Van puakna dingin eima khawisa sakol te mah kizang hi. Japan te-in hih Chin Levy cihkhawng thu-in hong simvetlo-in hong notto heuheu lel hi.
Phunom khuathung, Phaipheek mual – Tangvautam khawngah Indian force te-in galpang in adim ahaa in muanhuai takmah in a-om laitakin Fortwhite te pen 19/11/1943 ni-in Japan galkap te 7 Patrol in hongpai a, Phunom Buzung ah niangtui hong awm hithiat lel hi. A niangtui hawpzawh ciangin Fortwhite ah a ki lehkik phot hi.
Indian Force te-in Phaipheek mualdung ah Japan gal pangin hong omsung in, Sa Ration ding gan hongngen a, khuabup aii ding Pu Suan Zam’ sialpi kipia a, hong ngetkik ciangin Pu Ngen Tuang’ sialpi kipia hi.
1944 March leh April kawmin Phunom Phaipheek ah camp satin Indian Force te hongom hi-a, 14/3/1944 ni-in English te’n Tedim nusia cih azak ciangin, 15/3/1944 ni-in Phaiphek camp nusia in saklam ah a taito uh hi.
Indian Force te-in Phaipheek camp a nusiat peuh ciangin Japan galkap te hong tungpah uh a, Phunom Buzung leh Sang ah hong ompah uh hi. A ki zaakciil bang hong hilo-in Mikang galkap te Sangin hong thumanzaw a, gamsung ih bukna tek panin ihinn ihlo tek mah ki zuankik thei pah hi. A hizongin ka mittha aa, ateengden khat in a eek asuak ciang lamngei lampaam ah pial a eektha cih omlo-in ganhing bangin a eek asuakna peuh ah khuasung lamlai khawng ah tha pahpah a hihmanin kihhuai kisa mahmah hi. Khuasung taktak ah sauvetpi hong omsaplo in saklam ah ki notto pah uh hi.
India gam Kohima khua a tunpeet uh ciangin Mikang te-in naakpi takin nado-uh a, Tualai ah Japan te cimawh in a-om laitak in America te-in Japan te-ii galvan kholna Hiroshima khuapi-ah “Little Boy Bomb” a kici pi 9 leh letmat 8 asau, pi 2 leh letmat 2 azai, Kg 4040 angik, Athomic bomb khat a khiading in Tinian tuikulh tungpan 1945 kum August ni 6 ni zingsang nai 2 satzawhhiat in Lt. Col. Tibbets – B.29 Bomber tawh lengsuak vingveng a, 8:15 AM in Hiroshima khuatung pi 31000 kiim asaanna pan’ khiasuk a, Hiroshima khuapi hut leh vai suak in mi 140000 bang si hi. Athaiciang, August ni 9 ni-in a Godownpi, Nagasaki khuapi ah Atomic Bomb khatmah khiasak leuleu ahihman in, 14, 8, 1945 ni-in Japan khuapi in hong le lung, ci-in surrender hi, kici hi.
Japan te-in honguk sungin amau galkap dingin galkap hongdong a, Phunom khua panin Lam Za Khen, Zam Khup, Suan Ko Thawng, le Khai Nang te vatum uh hi. Amaute pen Chin Defence Army kici hi. (Japan galkap CDA te)
Japan galkap te Kohima pan hong nungkik ciangin Tedim gampan in Japan te nawhkhiat nading in Pu Hau Za Lian, Pu Thawng Cin Thang te makai in Sukte Independent Army (S.I.A) ci-in 26/6/1944 ni-in hong phuankhia a, tuasung mahah pasl tangzang khempeuh ma kipangkhawm hi. Tua sung ah thaupen Zothau ki zangnawnlo-in Kumpi lampan Rifle ki thoh hi. Nguai-an a hihleh eima ah tekmah kizang hi.
Khua huutna dingin khuasung ah Home Guard ci-in Pyitusit kiphuanlai hi. Hihte pen Japan kumpi-in gallel in surrender apiak 14/8/1945 dong Mikang kumpi tawh ma kipangkhawm hi. Japan te-in 17/3/1944 ni pan 19/10/1944 dong honguk hi.
Phunom khua pan in Japan galsung (1939-1945) a galkap a-om mi 32 te lakpa Havidar Mun Kang, L/Naik nSuan En, Rfm. Suak Za Kham, Rfm. Khoi Zam, Rfm. Siing Za Khup te-in gam adding in a nuntaakna hong beilawh uh hi.
Japan gal sian’ ciangin Mikang kumpi-in Levy sunga tum khempeuh Medal hongpia a, Medal ngah khempeuh Zothau lawng khat tek bawlkhuan, neihkhuan hong pia hi. Hihpen Reward a hihi.
PHUNOM MUALSUANG | Page 109-110
