CIIMNUAI KHUA SATNA
Luikaa khua pan anneek tuidawn haksatna tawh Laam inn a lamkik zawhloh uh hangin a ngeina bangin tuuk an kaihkhop zawh ciangin nitaaksim in Tual ah nungak tangval, naupangte pai in a gualnuam zel uh hi. Tuabang a naupang kimawl a gualnuamte lakpan kumsim in naupang khatta a mangzel hi.
Tua ahih manin Pu Dai Tawng in azawlpa Pu Hang Sawk kiangah khuakiim hoihkei, ci-in Luikaa khua pan Ciimnuai ah lo zotding zawn a, lokhual zuan in ateengto uh hi.
Tuazawh hun a sawtlo in nitaakkhat tual a naupang kimawlte atawpkuan khua paangsan laitak in nungak vai ciahhak khatin Tual a suangtumpi nuai pan in gulpi khat dawkto a, naupang khat amat a mu luilam hi. Tua numei in a khuapihte kiangah naupang mangzel ih cih tu nutaak in tual a suangtumpi nuaipan gulpi khat hong dawkto in naupang khat amat mu-ing, ci-a agen leh a khuapih te zong heh mahmah in tua gulpi a siahpah leh tuakum in tua gulpi dawkto nawnlo a, a maikum ciang in dawkto kik a a awk ngawngaw hi.
A khuazang in adawhleh saupitak mah dokkhia napi beithei hetlo a, mikhat in sauzong sau-e, gul hitantan, a cihleh a gul pau-a, “Nong kaihkaih uh hangin hong kaikhia zokei nuteh, kamei in van guh suangzual sunlai a, kapum in vetli akawilai hi,” a ci hi.
Tuabang in gulpi apau azak ciangin hi lailai maw, ci-in a kaihkhiat zawhna ciangpan temtawh sattan in a khuazang in ahawm uh hi. Tua gulsa ahawm uh ciangin khuanawl a nupi meingong Dim Deih a simmawhna un atak pialo in a lutang apia hi. Khuazang in lungdam in zuune sane in zan khuavak in gul aai in a omuh hi.
Tua nitaak in tua meingongnu in gunngal pan a hongpai pasal zin nih a neihi. Khua zandeuh ciangin a aklui khuang a, “Malzinteng ciahvua Luikaa khua ki tultuk,” a ci hi. A zinte-in lamdang sa-in a zinnu kiangah, tu-a akkhuang in “zinte aw ciah mengmeng un, Luikaa khua cimding hi,” cithongveh e, ka vaciah uh kullo dia, a cihleh a zinnu in ciah naikei un, sa huanphot ni, ci-in a meitawh a, a gullu a huan hi.
Tua ciangin a ak khuang leuleu a, a cihsa bangmah cikik hi. Tua ciangin a zinte-in, zinnu aw akkhuan’ lah kinawh semsem in, ko vaciah heuh nung; na khuapihte zong vahilh in a, nozong kihem dih un; a cihleh a zinnu in, tua ahihleh tawmvei nangaklai dih un, khuapihte vahilh ning, ci-in taipah samsam a, khuapih gul aai te kiangah a thuteng agenleh a khuapihte-in na thusimlo in, ak akhuanngei hi, na cihsan lel hi.
A zinnu a inn atunkik ciangin a thuktung a agullu huan min naikei am-aw, ci-in tuul tawh a sutsukleh a gullu in na ento lela kawmin pau-a, ka mittang nong sunkha deh, na ci laizang hi. Tua ciangin nupinu in thu hibang la hibang theingeikeng, ci-in a gullu huanna abeel suankhat suah in, a gullu huan a innnuai a a vok ankuang sungah sunkhat suahsuk in a zinte kiangah na ngakun, keizong hong zuining ci-in a uitalpi tawh a zinte a delhpah leh a khuanawl akaanphet ciangin Luikaa khua ki cimtham suk pah a, gunsung ki denna suk in Luikaa khua abei ta hi.
Tua ciangin meingongnu Luikaa khuangal a Bualtung khua ngei Baangzang ah tenga, amaikum ciangin tapano khat nei a, amin Sel Mang a phuak hi. A inn ciangdong uumngui khat zam a, hih uumngui koipan hongpaihiam ci-a, akan ciangin a ngullu buakna Luikaa khua pan a hongzam hi-a, uumpi lianmahmah khat angah hi. Tua uumngah lo-in toheng a, a sungah anau Sel Mang akem hi. Tua meingongnu Dim Deih in la phuak a, -
(a) Luikaa minin huk taleh Baangzang dawhin tam naleii,
(b) Lianu khatin khua vasat ing, Baangzang ah bansang ka gual hi-ee, a ci hi.
Luikaa khua pan asuakta sun te-in AD 1420 kum pawlin Ciimnuai ah khua nasat uh hi. Tua meingongnu a tapa tawh khangto in Baangzang pan Khulpi zuan a, Khulpi pan Ciimnuai khua abeel hi, kici hi. Ciimnuai khua pan mi hong pawlcin kik ciangin Saizang, Zophei, Kalzang, Geltui, Pakzang, Dimpi, Sasih, Teizang khuate hong sat in hong ki khenkhen uhhi.
Note: Meingongnu min pen Pu Hang Za Nang in Dim Deih in na ciamteh hi.
Meingongnu’ tapa minpen Teizang tangthu sungah Suk Zo in ki ciamteh hi.
PHUNOM MUALSUANG | Page 82-83
