AICIIN

Khuado pawi pen tuuk an laakzawhna pawipi a hihmah bang in, Aiciin pen khal ante kaihkhop zawhna pawipi a hihi. Bitpi kha (December) bei lam ah Tualteek te’ seh bangin kibawl hi. Ni khatbek kizang hi. Tuani in pasal te-in a tuinaak, a tuibul uh puahtheipen uh hi.

Nitaak ciang in tual tanute in, inn tangsiik a zuu pawtakhat tek a don uhleh tualteekpa’n zuu beekkhat, khuado lai a ngelzuu luupding a a omlai te-in tualah luup uh a, tualom la kai-in nungak tangval te a ihmut suahdong tual a kisa theilo lohon la, khuado late sa-in alaam uh hi.

Hih aiciin pen khuado nungzuihna cihding a hihi. Hih aiciin khit pan a kipan taang pokik dong khuado la kisa theilo hi. Banghanghiam cihleh sa leh taang kolhthei ci-in ki-um hi.

Aiciin ni-in “Tual phui sampa” in zuu phihin, “Kumciin keen” kihal hi. Papi te-in ken kakdan en in, “Kum niam ding, kum sang ding” cih gen khol uh hi. Tua genkholhna tawh kizui in, lo nasep ding kikal suan ciat hi.

Aiciin nitakin Tual ah “Tual-omla” kai-in khuado late sa-in ki laam a, “Ciahla” tawh kitawp sak hi. Aiciin laamna ah phiit kitum lo hi.