A HUNZUI IN KHANTOHNA
12.6.1928 kumin Kumpi Zolai Tan 4 sang kihonga, Taudawh vengah Sang inn kikoih hi. Siapi Cin Khaw Gin in sang siapi sem a, S.T. Hau Go in sangnaupang a lut masa pen ahi hi. (Admission khatna ahi hi.) Sang-inn mun leh sia-inn mun ding in, Pu Lam Eng in, tualpi dingin Pu Thang Pum in a ki zatnop laiteng a zat dingin a leitang uh zangsak ciat uh hi.
1.6.1945 kumin, Private Middle School kihonga, khua kiim teng tawh zat kim theih dingin Tuicing (Dimzang) vengah sang kituah to hi. (Tan V-VI)
1953-54 kum sungin Phunom manglai sang innpi (96’x24’x 12’) leisek tawh kilama Kham tung gam bup sungah aituam leisek sanginn aki lam masa pen ahi hi.
1954-55 in Tan 7 kihonga mi 14 pha hi. Gambup laihuan hi a, 7 in ong hi.
5.4.1966 kumin Kawlgam kumpi in Tangpi’ neih Manglai Sang in hong koih sak a, Sia A. Kham Zam (Suangpi) in Siapi (Act. H/M) sem hi.
5.6.1970 Kumin kumpi in kumpi Manglai Tan giat sang hong pia a, Siapi C. Mang Thawng (Thuklai) in siapi sem hi.
Sang huang dingin akisam zah leitang Pa Tun Za Kai (Ex. Capt) Pa Lam Za Dal leh Pa Tun Sing te-in akong akhawnkhong (manngen lo) in pia ciat uh hi.
1951-65 America Baptist Foreign Mission te-in, 1951 pan 1965 kum dong kum 15 sung kumsimin Ks 500 ta tawh huh den hi. Rev. F.O. Nelson in 1951 kumin Ks 200/- tawh huh hi. American Baptist Mission Aided Middle School min 1966 dong kipua sak hi.
Rev. Mang Kam (Thangnuai) in Sang inn leisek hal nadingin, sing tan 20 pia thong hi.
1955 kumin Capt. Vung Khaw Nang (Suangpi) in sabuai khat leh tutna khat (table & Chair) pia hi.
1956 kumin General Ne Win in sum Ks 200/- tawh huh hi.
1957 kumin Rin. Kang Khaw Ngin (Phunom) in sabuai naipi khat pia hi.
1959 kumin Capt. Sing Za Cin (Thangnuai) in English typewriter (Remington) khat leh sportshirt 15 pia a, Khamtung gambup ah typewriter a pia khong masa pen ahi hi.
1961 kumin U Nu in Ks 600/- tawh huh hi.
1991 kumin Col.H. Kam Pum in Quartz naipi khat leh laibu nam tuamtuam bu 250, Sang laibusal (library) a dingin pia hi. Siapi Suan Khan Mang in laibu tuamtuam bu 100 pia hi. Phunom B.E.M.S Laibusal ah 16.10.1991 in laibu tuamtuam 1536 om hi.
Sang a nek ding vok, keel apia leh zat ding van zat atuamtuamte a pia zong omlai uh hi.
21.8.1991 kumin gamuk kumpi in Phunom khuapi vengah, kumpi Zolai tan 4 sang khat hong pia thuah hi.
1994-1995 sangkah kum pan tan 9 leh tan 10 Thuklai Sangpi’ let dingin khuanu khuapa hanciamna tawh kihong a, Sia Ngin Khaw Cin (Zung-SAT, retd) in siapi mawhpuak (tavuan) la hi.
1.10.2003 kum pan tan 9 leh tan 10 Thuklai Sangpi’ let dingin kumpi phalna kingah hi.
11.4.2003 in Phunom khua ah sangngahzawh kum 75 pawi kikhaam.
03.06.2013 kumin kumpi in Tan 10 sang (High School) hongpia hi.
PHUNOM MUALSUANG | Page 61-62
