SILH LEH TEEN

SILH LEH TEEN

Silh leh teen te pasal zat leh numei zat in kikhen hi. Pasalte in puantual (tualpuan), tangciing, puanza laisante silh uh a, angkee ci-in puanteen tom teeng uh hi. Sam hawi in a deek ah “tuktum” kici a sam tum uh hi.

A gal-aih, a sa-aih ciat uh tawh kizui in dialkang, dial vom, dial san te alu ah khum uh hi.

Numeite in niiksiing teengin, puandum(tawngnok), khee-phiau, puanvaan (dialpuan) te silh uh hi. A sam uh va/ba thumin khen uh hi. (Haunung numeite in ta aneih uh ciangin a sam uh va/ba nihin khen uh hi.)

Ngun tau, sumngo taute bulhin, suang nam tuamtuam tawh kibawl khipi, kibah leh keppite awh uh hi. Nuang(kepno) leh dangkatang tawh kibawl kawngkhaute teng uh hi. Khi tang leh dangka tang tawh kibawl bilbah tuamtuamte bah uh hi.