SEP LEH BAWL

SEP LEH BAWL

Lokhawh, sing-eh, singpuak, singsuih, sing-at, khaukhek khauphan, siamngat, savai, sasiah, singno ciin, huan bawl (meh ciin,) sikseek, sum zonna a kipan nasep tuamtuamte ki sem hi. Inn kim ah keel, vok, ui leh ak te khawi ciat uh hi. Keel kikhawi a keelnawi ki tam nek hi. Pawl khat te-in bawng leh sial te zong khawi uh hi.

Van zatte:

Sing nasepna in hei, tem, kuangtu, sum khuak, nakkhuatte ki zang hi. Lei nasepna in tuzum, tupi, pokpek, tuka, tuman, sikmolh nam tuamtuam kizang hi. Van puak na dingin bawm, sengvang, sengbing, seu, kolhak leh nam te kizang hi. An pho nadingin pheek leh lawhpite kizang hi. An teh na dingin hai, puata, lawhbeu, tawiciang, khum, seu leh beem te kizang hi. An a seepna dingin lawhpi, an silna dingin an suukna ciang, an siansak nadingin an haih ciang, tang cil na dingin singkhia a kici tang cil ciang a annek teh nadingin annek teh lawhte kizang hi.  An suk na dingin sum leh suk kizang hi. An huanna dingin leibeel, ngaan (leibeel ahih kei leh sing beel), taubeel, vanlengbeel, danbeel leh beelpeu te kizang hi.