THUPATNA
Phunom khua tangthu ih gelh ma in Kawlgam, Khamtung gam leh Tedim gam ah Khamtung mi (Zomi) te hong tun zia a tomin ih en masa ding hi.
Kawlgam ah Zomite tun zia:
Nidanglai-in ih pute ihpate in kam gen bek tawh thu na ciamteh uh hi. Tua hangin sawt pek lai a ihtenna mun leh thu te kithei khin zo nawn lo hi.
Pu leh pate in a teen ngeina mun atheih tawpna pen Sibet (Tibet) gam hi, na ci uh hi. Pu leh pate in, “Ih pute unau nih pha in Pu Zo leh Pu Zipau hi” ci-in na ciamteh uh hi.
Sibet gam pan unau teng kizawnin simlam gam nem zuanin na tuak suksuk uh hi. Kawlgam khung lam pan gunnak khat zui in hong pai suksuk uh leh, gunpi nih kituahna zangkuam zapi sung hong tung uh hi. Gun lianzaw “Ei zuan na ding” gun ci-in gun neuzaw pen “Tui kang gun” na ci uh hi.
Tua zangkuam sungtengah vakin Manta-lei khua, Amlampa’ lo khuate sat in, hunkhat sung na teeng uh hi. Gal leh sa a tam manin Zipau suan teng Ei zuan nading gun nak lam zuanin kileh kik uh hi. Zo’ suan teng zong Tuikanggun nak lam zuanin na tai toto uh hi. Zo’ suan pawkhat te gam kuan thangsiah na hangin a sanggam te tawh hong kikhen uh hi.
Tui kang gun dung zui a hong pai uh leh gunneu ka khat hong tuak uh hi. Tui kang gun kantanin tua gun kituahna mun “Gun Khawm” ah tawlkhat sung na teng uh hi. Tua gunneu pen “Nahkateh” gun na ci uh hi. Tuamun ah a teen laitak uh in Shiang (Shan) te-in na sim zelzel uh hi. Shiang gal hangin unau teng sak leh khang ah kikhen hongsawm uh hi. Unau khat i hih manin i kitelkhialh loh nading ci-in, U zaw’ suan teng in deek ah, nau lai’ suan teng in luzaangah, nau zaw’ suan teng in tal ah ihsam tum tek ding hi hang ci-in thu ki vaikha uh hi. Nahkateh gun nak lam zui-in hong paitek uh a, “Kha-man khua sat in kum tampi na teeng uh hi.
(Kha man sung a sat uh khua ahih manin “Kha-man khua” a ci uh ahi hi.)
Khamtung (zo) gam ah mi tun zia:
Kha-mang ah a teen hun sungin, Khawl (Kawl) mang te in kulh bawl ding in nisimin mi khawm tawntung uh hi. Tua thu hang leh gal leh sa tuamtuam te hangin, Khaman’ khua nusiat hong sawm uh hi. Pawlkhat et in Nahkateh gundung zuikawm kantan kawmin Khamtung (zo)gam lam zuanin hong taikhia uh hi.
Tedim gamah mi tun zia:
Pawlkhat te Pu Song Thu makai in tuingo lui dung zui in taito uh hi. Tawivum pa’n gam en uh a, mual sang zaw Thuamvum na delh uh hi. Thuamvum pa’n gam leh lei khempeuh kimu ahih manin, tua munah suangthu phutin “Mui biak” na bawl uh hi. Thuamvum pa’n pawlkhat mai ziatlam mualdung zui in, pawlkhat nung veilam mual dung zui in gun lam zuanin hong pai uh hi. Mual dawn pa’n khuadak zel uh a, gunpi kaa ah kituak kik uh hi. Gunpi kaa ah khua sat uh a, “Luika khua” na ci uh hi.
Luika khua pa’n “Ciimnuai, “Bualtung, Zophei, Bangzang, Kulpi, Botung, Tumzang, Kalzang, Phaipi, Bellei, Muizawl, Haiciin, Suanzo, Sasih, Suangkang, Vanglai, Teikhang, Teizang, Galzang, Takmual, Thanglo, Khualai, Khuangen, Engzang, Suangzang, Haikawn, Anngo, Khaukul, Zuangzang…. Cih bangin Tedim gam sung mun tuamtuam zuanin khuasatin na teeng uh hi.
Ih teenna mual leh guamte halna hangin gamtat, kampau tawh kizui in minam tuamtuam zui-in khua na satin na teeng uh hi.
Phunom khanglui upate in Zomite’ pianna tangthu uh a suut uh ciangin “Luika khua” pan pan uh hi.
