PHUNOM KHUA-MIN NGAHZIA
Hiangzang ah nuamsa a, a teen laitak uh’n pul natna tung ahih man in lobuuk, gamsung mun tuamtuam ah khuazang phial in kihemciat uh hi. Pulnat om sungin mi (80) si hi. Pul ven ciangin a damlai sun teng kikaikhawm kik uh hi. A hih hangin a khua uh gim neih in, a inn te-uh ah a lutkik ding thadam tek uh hi. Tua ahih manin a teenna ding mun hoihna “Phun (ai) en uh hi. A phun’ ngahna mun ah teeng pah dingin pawlkhatte in a inn uh phelin kituah pah uh hi. Phun’ ngahna mun ah teng uh ahih manin, Phun’om khua ci pah uh hi. Phunom cih pen mun leh gam min, mi min hi lo a, “Ai hoih hi, kaam om hi” cihna ahihi.
Nophun, dahhun a ki minlawh ciangin, khua sat, tui khuatna min tawh ki minlawh theibek hi. Tua thu hangin Phunom khua a mi peuhmah a ki min lawh ciangin, “Phunom-a mi” na cilo uh a, tuikhuat khua min la in, “Hiangzang-a mi” na ci teekteek uh hi.
Phunom khua mun pen Hiangzang khua thung hi a, botung leh bonuai a kikhen bek ahi hi. Hiangzang khua munlui pen tu-in “Khua-mun” a hih kei leh “Khua-nuai” kici a, inn mun luite kimu thei lai hi.
Khua kisat cilin inn (5) pha a, 1896 kumin inn (58) pha hi. Tu laitakin Dimzang, Ngal, Khuapi ci-in vengmin kipia in kikhen hi. Dimzang ah 1950 March in Rev. Mang Kam teeng masa in Capt. Neng Za Ngin pen July 1950 in na teeng hi. Ngal ah 1966 kumin Pu Suak Pian Thang na teeng masa hi.
