Phunom gam sungah khua mun lui (4) om hi. Tuate in- 1. Engzang 2. Khua-lai 3. Khua-ngen 4. Hiangzang (Khuanuai)te a hi-uh hi.
1. Engzang:
A.D 1400 kum pawlin ki sat hi. Khua sat kua hi cih ki thei cian lo a, “Man Lun, Man Tuangte teng hi “kici hi. Man Lun, Man Tuangte a phat laitakin Muang Thang leh Muang Dote unau in Vangteh gam Tumzang pa’n nabeel hi.
Muang Thang, Engzang ah teeng suaka, Muang Do pen Engzang pa’n khumzang, Khumzang pa’n Valgam Haiciin na tung hi. Muang Thang in tapa Mang Kim, Mang Kim in tapa Lamh Thang nei hi. Lamh Thang in tapa Tun Tawng leh Tun Lam nei hi.
Muang Thang leh Muang Do, Engzang a tun zawh Khangthumna Lamh Thang a khan laitakin, Man Lun leh Man Tuangte a zawl sihzangte tawh valuk mei len sazuk mei hangin na kitelkhial uh hi. Tua hun laitak lian in Engzang khua galte’n hong sim ahih manin, a inn alote uh halin sak leh khang zuanin na tai uh hi. Sak lam (Zo lam) zuan atai teng “Zote” na ci pah uh hi.
2. Khua-lai:
AD 1500 kum bei pawlin Suante’ Tung, Samte Pu Lamh Lut te in, Kal zang pan a sat uh ahi hi.
Phunom khua ii nisuahna khanglam tai khatna Sialten lui tungah om hi. 1893 February 20 ni in Mikang kumpi in Phunom khua ah kigawm sak hi. Tuni dong in inn mun lui, tual, khuamual leh han munte kimu thei lai hi.
3. Khua-ngen:
AD 1550 kum pawlin Suante Pu Phung Lai leh Pu Lun Lam te in a sat uh ahi hi. Sunphu khat leh Pawi gal luana hangin khua lal uh hi. Phunom khua nisuahna lam tai khatna Thangnuai tawh kikal ah om hi. Tuni dongin inn mun lui leh tual suang phahte kimu thei lai hi.
4. Hiangzang:
Engzang pa’n Pu Lamh Thang te innkuanin Kalzang tuh in Bellei ah teng uh hi. Bellei pa’n Pu Lamh Thang’ tate Pu Tun Thawng leh Pu Tun Lam hong khan ciangin, Suanzo Pu Suan Tawng, Kalzang a teeng Suante Pu Mang Hil, Buansing Pu Phut Lam te zawn in, A.D 1500 kum pawlin Engzang ah zuan kik uh hi. Khangluite in, “Eimau mei san tawinasa ah lut kik nuam lo” na ci-uh hi. Tua thu hangin Engzang khua munlui sung ah teen kik sawm nawnlo in, ani tumna lam “Hiangzang” a cihna mun ah tui khuatin khua sat uh hi. Tua banga khua a satciangin Pu Tun Lam in:
(a) Khua vatu ing, khua vatu ing ka namtawng tawh khua vatu ing
(b) Ka nam tawng tawh khua vatu ing. Ban-sak ban-khang phei va den ing, ci-in khua sat la na phuak hi.
